Tokıodaǵy poıyzda er adam 17 jolaýshyny pyshaqtady
TOKIO. QazAqparat – Tokıo prefektýrasynyń Tefý qalasynda qolynda pyshaǵy bar er adam poıyz jolaýshylaryna shabýyl jasady. Keio temirjol kompanııasyna tıesili poıyzdaǵy oqıǵa kezinde 17 adam zardap shekken, dep habarlaıdy QazAqparat NHK telekanalyna silteme jasap.
Jaraqat alǵan adamdardyń ishinde bir naýqas es-tússiz jatyr. Qylmysker poıyzda tez janatyn suıyq tógip, ony órtegen. Ottan vagonnyń birneshe oryndyǵy kúıip qaldy.
Shabýyl poıyz bir stansadan shyǵyp ekinshisine bara jatqan kezde bolǵan.
Polıtsııa poıyz kelesi platformaǵa jetken kezde qylmyskerdi ustady. Er adam tártip saqshylaryna qarsylyq kórsetpegen. Ol óziniń áreketin «eki ne odan da kóp adam óltirip, sotta ólim jazasyn alǵym keledi» dep túsindirgen. Qylmys bolǵan jelide poıyzdar qozǵalysy tolyq toqtatyldy.
