Tokıodaǵy kınofestıval: Úzdik fılmder men akterlerdiń esimderi ataldy
ASTANA. QazAqparat - Tokıoda ótip jatqan halyqaralyq kınofestıval forýmnyń úzdik fılmderi men akterleriniń esimderin atap, Brazılııa, Frantsııa, Túrkııa jáne Danııanyń fılmderine alty nagradany tabystady.
Birden eki júlde - 28-shi Tokıo halyqaralyq kınofestıvaliniń bas júldesi - «Tokıo Gran Prı» men áıelderdiń úzdik róli úshin nagradany Brazılııada rejısser Roberto Berlınerdiń túsirgen "Nıze da Sılveıra: keıipter senorasy " (Nise da Silveira: Senhora das Imagens) fılmi aldy. Onda áıeldiń bas rólin aktrısa Glorııa Pıres somdaǵan.
Rejısser Mustafa Karanyń «Kalandar sýyǵy» fılmi de eki júlde - Wowow telearnasynyń nagradasy men úzdik rejısserlyq jumys úshin júldege ıe boldy. Fılm Túrkııada Qara teńizdiń qasynda turatyn otbasynyń ómirine arnalǵan.
Qazylar alqasynyń erekshe syılyǵy Iranda týylǵan frantsııalyq rejısser Keıronniń «Úsheýimiz nemese eshteńe de emes» ("Nous trois ou rien") atty avtobıografııalyq fılmine berildi. Bul kartına Parıjdegi ırandyq emıgranttar týraly baıandaıdy.
Kórkemdik úles qosqany úshin júldeni rejısser Olmo Omerzýdiń «Otbasylyq fılm» kartınasy aldy. Er adamdardyń úzdik róli úshin syılyq eki akter - Rolland Meller men Lýıs Hoffmanǵa «Mınalar eli» ("Under sandet") dat-nemis fılmindegi rólderi úshin berildi. Bul fılm Ekinshi dúnıejúzilik soǵystan keıin Danııanyń jaǵalaýynda mınalardy qazyp jatqan nemis sarbazdary týraly baıandaıdy.
Tokıodaǵy kınofestıval Azııadaǵy eń iri kınoforým bolyp tabylady.
