Tokıodaǵy kınofestıvalde «Ózen» fılminiń tusaýkeseri ótedi

«Qazaqfılm» kınostýdııasynyń habarlaýynsha, Festıvaldiń negizgi baıqaýyna 109 elden 1,8 myńnan astam fılm kelip túsken. Nátıjesinde, negizgi baıqaýǵa otandyq «Ózen» fılminen basqa, Eýropa, Azııa jáne Afrıka rejısserleri túsirgen 15 fılm iriktelinip alyndy. Festıvaldiń ashylý saltanatynda Bredlı Kýperdyń rejısserlik debıýti - «Juldyz týyldy» mıýzıkli kórsetiletin bolady. 

Atalǵan halyqaralyq kınofestıvaldiń qazylar alqasynyń quramyna rejısser Brılıante Mendosa, prodıýser Braıan Berk, aktrısalar - Tarane Alıdostı jáne Kaho Mınamı, rejısser ári prodıýser Stenlı Kvan kirdi. 
«Emır Baıǵazın - Qazaqstan atynan usynylyp otyrǵan «Ózen» fılminiń rejısseri. Bul fılm erekshe túsirilgen. Emır Baıǵazın - osy esimdi esten shyǵarmańyzdar», - dedi festıvaldiń dırektory Esı ıAtabe fılmniń tanystyrylymynda. 
«Ózen» fılminiń álemdik tusaýkeseri Venetsııa kınofestıvali sheńberinde ótken bolatyn. Bul festıvaldiń «Kókjıekter» baǵdarlamasynda Emır Baıǵazın úzdik rejısser atandy. Al fılmniń Soltústik Amerıkadaǵy tusaýkeseri qyrkúıek aıynda Halyqaralyq Toronto kınofestıvali aıasynda ótti. Kınotýyndy festıvaldiń «Tuǵyrnama» («Platforma») konkýrstyq baǵdarlamasynda  kórsetilip, qazylar alqasynyń qurmetti atalymyna jáne Screen Daily táýelsiz kınosynshylardyń reıtıngisi tiziminde aldyńǵy qatardan kórindi. Odan bólek, «Ózen» fılmi úshin Emır Baıǵazın Gollıvýdtyń shetel baspasózi qaýymdastyǵynyń grantyna ıe boldy. 
«Ózen» fılmi órkenıetten alys jerde turatyn, qaladan kelgen qonaqtan keıin ómirleri kúrt ózgere bastaǵan bes aǵaıyndy týraly baıandaıdy. Aslan týraly trılogııanyń aldyńǵy eki bólimi 2013 jáne 2016 jyldary Berlın kınofestıvaliniń negizgi baǵdarlamasyna qatysqan bolatyn. «Aslannyń sabaqtary» fılmi «Kúmis aıý» jáne Morgenpost nemis gazetiniń júldesimen marapatalǵan.