Tokıoda júlde alǵan «Aqyn» fılmi Berlınde kórsetildi
Otandyq týyndyny prodıýser ıÝlııa Kım jáne aktrısa Gúljan Túzelbaeva tanystyrdy.
«Fılmniń tusaýkeserine qatysyp otyrǵanymyzǵa óte qýanyshtymyz. Rejısser Dárejan Ómirbaev kórsetilimge qatysa almady. Bizdiń fılm Tıktok jaılaǵan dáýirde saf ónerdiń – poezııanyń eshkimge de kerek bolmaı qalǵany týraly baıandalady. Meniń oıymsha, shynaıy ónerge berilgen keıbir shyǵarmashylyq jandar bul fılmde ózderin kóre alady. Men fılmdegi basty keıipkerdiń obrazynda rejısserdiń ózin kórip turǵandaımyn. Osy kınotýyndynyń jaryq kórýine atsalysýǵa múmkindik bergen Dárejan Ómirbaevqa alǵysymdy bildiremin», - dedi ıÝlııa Kım.
Qazaqstandyq kınotýyndy Berlın kınofestıvali kórermenderiniń erekshe qyzyǵýshylyǵyn týdyrǵan. Bul kórsetilimge bıletter birneshe kún buryn satylyp ketken eken. Tusaýkeserge kelgen qonaqtardyń arasynda Dárejan Ómirbaevtyń shyǵarmashylyǵymen burynnan tanys kórermender de boldy.
«Aqyn» fılmi tehnologııalar damyǵan qazirgi zamanda ónerdiń qoǵamda alatyn orny týraly oı qozǵap, poezııaǵa suranys azaıǵan dáýirde aqynnyń kúıinishi týraly syr shertedi. Qazaq halqynyń XIX ǵasyrdaǵy eń kórnekti aqyndarynyń biri Mahambet Ótemisulynyń qıly taǵdyry jaıynda oıǵa batqan basty keıipker názik júrekti aqyndardyń ómiri qashan da qıyn bolǵanyn túsinedi. Fılmniń stsenarııi nemis jazýshysy German Gesseniń «Avtorlyq kesh» atty avtobıografııalyq áńgimesi jelisimen jazylǵan. Fılmdegi basty róldi «Jigitter» tobynyń ánshisi Erdos Qanaev somdaıdy.
Eske sala ketsek, atalǵan fılm Tokıoda ótken halyqaralyq kınofestıvalde alǵash kórsetilip, Dárejan Ómirbaev «Úzdik rejısser» júldesimen marapattalǵan bolatyn.
Osymen 72-shi ret ótkizilip jatqan Halyqaralyq Berlın kınofestıvaliniń jeńimpazdary aqpannyń 16-nda jarııalanady.
