Tokıoda jańbyr maýsymy aıaqtalyp, aýa temperatýrasy 35°C-tan asty
ASTANA. KAZINFORM – Japonııanyń astanasy Tokıoda jańbyr maýsymy aıaqtalyp, aýa temperatýrasy 35°C-qa jetti. Elde bıyl alǵash ret aptap ystyq tirkeldi, dep habarlaıdy Kyodo News agenttigi.
Japonııa meteorologııa agenttiginiń málimetinshe, Tokıo men Nagoıa sııaqty óńirlerde jańbyrly maýsym aıaqtalǵan bolýy múmkin. Tokıoda aýa temperatýrasy 35°C-qa jetip, bıylǵy alǵashqy aptap ystyq tirkeldi.
Úsh kúndik demalystyń sońǵy kúninde Japonııanyń basym bóliginde aptap ystyqqa baılanysty eskertý jarııalandy. Agenttik málimetine sáıkes, dúısenbi kúni saǵat 18:00-degi jaǵdaı boıynsha eldegi 914 meteobaqylaý pýnktiniń 250-den astamynda aýa temperatýrasy 35°C jáne odan joǵary bolǵan. Bul – bıylǵy eń joǵary kórsetkish.
Japonııa meteorologııa agenttiginiń dereginshe, Tokıonyń batysyndaǵy ıAmanası prefektýrasynyń Kosıý qalasynda aýa temperatýrasy 39,4°C-qa deıin kóterilse, Tokıo qalasynyń ortalyǵynda 36,1°C bolǵan.
Tokıo kiretin Kanto–Kosın óńirinde jańbyrly maýsym byltyrǵyǵa qaraǵanda shamamen 22 kún kesh aıaqtaldy. Al ortalyǵy Aıtı prefektýrasyndaǵy Nagoıa qalasy sanalatyn Tokaı óńirinde bul merzim 23 kúnge keshikti.
Buǵan deıin, 13 shildede Japonııanyń ońtústik-batysyndaǵy Kıýsıý óńirinde jańbyrly maýsymnyń aıaqtalǵany jarııalanǵan bolatyn.
Meteorologııa agenttiginiń boljamynsha, seısenbi kúni de joǵary temperatýra saqtalady.
Aıta keteıik, buǵan deıin Almatydaǵy aptap ystyq rekord jańartqanyn jazdyq.
Al Eýropadaǵy aptap ystyqtan 12 myńnan astam adam kóz jumdy.
