Tokıoda XXV jazǵy Sýrdlımpıada oıyndary bastaldy
ASTANA. KAZINFORM — 15 qarasha kúni Japonııanyń astanasy — Tokıoda XXV jazǵy Sýrdlımpıada oıyndarynyń resmı ashylý saltanaty ótti. Estý qabileti zaqymdanǵan sportshylar arasynda tórt jylda bir ótetin dúbirli doda bıyl erekshe tarıhı mánge ıe — Sýrdlımpıadalyq qozǵalystyń 100 jyldyǵymen tuspa-tus keldi. Bul týraly Sport komıteti habarlady.
Saltanatty sherýde elimizdiń kók baıraǵyn sýrdo dzıýdodan Qazaqstan Respýblıkasynyń sport sheberleri, XXIV jazǵy Sýrdlımpıada oıyndarynyń júldegerleri Aıdos Túgelbaev pen Anna Kramorova kóterip shyqty.
— Elimizdiń Týyn halyqaralyq arenada kóterip shyǵý árbir sportshy úshin eń úlken abyroı. Bul maǵan artylǵan zor senim ári úlken jaýapkershilik. Osy senimdi aqtaý úshin bar kúsh-jigerimdi salamyn, — dedi Aıdos Túgelbaev.
Sondaı-aq, Ulttyq Sýrdlımpıada komıtetiniń prezıdenti Serik Sápıev sportshylarǵa qoldaý kórsetip, óz pikirin bildirdi.
— Bul oıyndar sportshylarymyzdyń eń joǵary deńgeıde básekege qabiletti ekenin dáleldeıtin múmkindik. Qazaqstandyq komanda úlken daıyndyqtan ótti, árbir sportshy jarys jolyna bir maqsatpen el abyroıyn asqaqtatý úshin shyǵady, — dedi ol.
Ashylý saltanaty Tokıo Metropolıten gımnazııasy sport kesheninde ótti. Sharany Estý qabileti zaqymdanǵan sportshylar sportynyń halyqaralyq komıteti (ICSD) prezıdenti Adam Kosa ashyp, barlyq qatysýshy elderge sáttilik tiledi.
Baǵdarlamanyń kórkemdik bóligi Japonııanyń ulttyq mádenıetin kórsetip, estıtin jáne estý qabileti zaqymdanǵan jandar arasyndaǵy baılanysty nyǵaıtýǵa baǵyttaldy. Sahnalyq qoıylymdar Sýrdlımpıadanyń 100 jyldyq tarıhyn, onyń rýhyn jáne mádenıetter arasyndaǵy ózara túsinistik pen birlikti dáripteýdi maqsat etti.
Bıylǵy oıyndarda 81 elden 3000-ǵa jýyq sportshy qatysyp, 21 sport túrinen 209 dıstsıplınada baq synaıdy.Qazaqstan ulttyq quramasy 78 sportshydan quralǵan jáne 8 sport túri boıynsha el namysyn qorǵaıdy.
Ulttyq qurama úshin alǵashqy jarystar 16 qarashada sýrdo dzıýdo men sýrdo badmıntonnan bastalady. Keıin jarys kestesine sáıkes jeńil atletıka, ústel tennısi, júzý, grek-rım kúresi, taekvondo jáne erkin kúres dodalary jalǵasady.
Aıta ketelik «Barys» búgin Reseıde «Lokomotıvpen» kezdesedi.