Tokıoda tolassyz jaýǵan jańbyr kólik qatynasyn úzdi

ASTANA. KAZINFORM — Aldyn ala málimet boıynsha, beısenbi kúni Japonııa astanasy Tokıoda jaýǵan nóser jańbyr bir adamnyń ómirin qıdy, dep habarlaıdy Kyodo News. 

Jergilikti polıtsııanyń málimetinshe, Ota aýdanyndaǵy portta qulaǵan birneshe konteıner eki adamdy basyp qalǵan. Bir er adam oqıǵa ornynda kóz jumdy, al onyń áriptesi aýrýhanaǵa jetkizildi.

Tolassyz jaýǵan jańbyr kólik qatynasyn da úzdi. JR Tokai kompanııasy Tokıo men kórshiles Kanagava prefektýrasy arasyndaǵy sınkansen qozǵalysyn ýaqytsha toqtatqanyn, bul shamamen 100 myń jolaýshyǵa áser etkenin habarlady. JR East sonymen qatar astanadaǵy keıbir poıyzdardyń keshigýi týraly habarlady.

Naızaǵaı men tolassyz jaýǵan jańbyr Tokıonyń Haneda áýejaıynda qyzmet kórsetýdi toqtatty, onda reıster keshiktirilip, toqtatyldy.

— Setagaıa aýdanynda beısenbi kúni tústen keıin bir saǵatta 92,0 mm jańbyr jaýdy, al Ota aýdanynda 88,5 mm jaýyp, osy aýdandarda rekord ornatty, — dep habarlady Japonııa meteorologııalyq agenttigi.

Kyodo News málimetinshe, meteorologııalyq basqarma juma kúni Japonııanyń shyǵysy men batysynda qatty jańbyr jaýatynyn eskertip, turǵyndardy naızaǵaı, tornado, qatty jel jáne burshaq qaýpine baılanysty erekshe saq bolýǵa shaqyrdy.

Buǵan deıin Balıdegi sý tasqynynan qaza tapqandar sany 19 adamǵa jetkenin jazǵan bolatynbyz.