Tokıoda taıfýnǵa baılanysty 900-den astam áýe reısi toqtatyldy
ASTANA. QazAqparat - Japonııanyń batysyna «Tramı» atty surapyl taıfýn jaqyndap keledi, dep habarlaıdy QazAqparat Kyodo news agenttigine silteme jasap.
Japon meteorologııalyq agenttiginiń habarlaýynsha, taıfýn eldiń batysyndaǵy Kochi prefektýrasynda, Ashizuri múıisinen ońtústik-batysqa qaraı 90 shaqyrym jerde 45 km/saǵ jyldamdyqpen soǵyp tur. Kansaı halyqaralyq áýejaıy dúısenbige deıin jabyq. Mınamıosýmı jáne ıAkýsıma qalalarynda, Kagosıma prefektýrasynda jaýǵan jaýyn-shashyn saǵatyna 120 mm-ge deıin jetip otyr. 900 áýe reısi toqtatylyp, sonyń saldarynan 70 myń jolaýshy jolynan qalǵan. Tokıo, Sın-Osaka jáne Hırosıma arasyndaǵy temirjol qatynasy da qıyndaǵan. Batys Japonııadaǵy kóptegen jergilikti temirjol qyzmetteri jumysyn toqtatqan.
Sońǵy málimet boıynsha, taıfýnnan keminde 50 adam zardap shekken.
Atap óteıik, bıyl Japonııa birneshe taıfýnǵa tótep berýge májbúr boldy. Sonyń ishinde «Prapırýn» taıfýny Batys Japonııaǵa nóser jaýyn, sý tasqyny, laı kóshkinin alyp keldi. 4 qyrkúıek kúni «Djebı» taıfýny saldarynan Kansaı halyqaralyq áýejaıynyń termınaly men ushý-qoný jolaǵyn sý basqan bolatyn.
