Tokıoda óz rekordtarymdy jańartqym keledi - Zúlfııa Ǵabıdýllına
ASTANA. QazAqparat - Qazaqstan tarıxyndaǵy tuńǵysh Paralımpıada chempıony Zúlfııa Ǵabıdýllına 2020 jyly Tokıoda ótetin kelesi Paralımpıada oıyndaryna qatysýǵa nıetti.
"Tokıoǵa daıyndalatyn bolamyz, óz rekordtarymdy jańartýǵa tyrysamyn", - dedi búgin Rıo-de-Janeırodan oralǵan sportshy tilshilerge bergen suxbatynda.
Onyń sózine qaraǵanda, álem rekordyn ornatyp, paralımpıada altynyn jeńip alatynyn bapkerimen birge aldyn ala sezgen.
"Tablodan nátıjemdi kórgende, oılaǵan josparymyz oryndalǵanyna qatty qýandym. Eń birinshi jeńisimdi bapkerime, sosyn barsha qazaqstandyqtarǵa arnaımyn. Jeńis birden kelgen joq, men oǵan 25 jyl boıy daıyndaldym. Kezeń-kezeńmen nátıjelerimdi jaqsartyp, bapkerdiń durys taktıkasy arqasynda jettim", - dedi ol.
Aıta keteıik, qazaqstandyq júzýshi álem rekordyn jańartyp, altyn medal enshilep qana qoımaı, Paralımpıada oıyndarynyń úzdik sportshy áıelderiniń úshtigine endi.
"Úshtikke qalaı engenimdi ózim de bilmeımin. Men árdaıym kóńildi júretinimdi, jarqyn júzimdi kórip, unatqan shyǵar, sol sebepti tizimge engen de bolarmyn", - dedi Z. Ǵabıdýllına.
Eske salsaq, Rıoda ótken Paralımpıada oıyndarynyń nátıjesi boıynsha, Zýlfııa Ǵabıdýllına 100 metrge erkin ádispen júzýden altyn medal jeńip aldy. Sonymen qatar 50 metrge erkin ádispen júzýden 4-oryn jáne 50 metrge shalqalap júzýden 6-oryn ıelendi.
Rıodaǵy Paralımpıada oıyndaryna Qazaqstannan barlyǵy 11 sportshy attanǵan bolatyn.
