Tokıoda kóshege qoqys tastaýǵa tyıym salynbaq
ASTANA. KAZINFORM — Tokıo bıligi qala ortalyǵynda qoqys kóleminiń kóbeıgenine baılanysty qoǵamdyq oryndarǵa qoqys tastaýǵa tyıym salýy múmkin. Buǵan týrıster sanynyń ósýi sebep bolǵan, dep habarlaıdy Kazinform agenttigi Kyodo-ǵa silteme jasap.
Úkimet derekkózderiniń habarlaýynsha, bılik kóshege qoqys tastaǵandarǵa ákimshilik aıyppul salý máselesin talqylamaq. Sonymen qatar azyq-túlik pen sýsyn satýshylarǵa jáne qaptama óndirýshilerge birqatar jańa mindet júkteý josparlanyp otyr.
Tokıo úshin ózen jaǵalaýlarynda káýaptan keıin qalatyn qoqys ta ózekti máselege aınaldy. Bılik qandaı qaldyq túrleri men áreketterge shekteý qoıatynyn, sondaı-aq jańa talaptardy qaı aýmaqtardan bastaý qajettigin talqylaıdy.
Qazir Tokıonyń keıbir aýdandarynda osyǵan uqsas erejeler engizilgen. Alaıda biryńǵaı talaptar erejelerdi birizdendirip, máseleni búkil qala boıynsha júıeli sheshýge múmkindik beredi.
Sındzıýký aýdanynda qoqysqa tastaýǵa tyıym salynǵan zattardyń qatary kóbeıedi. Qazir bul tizimge bótelkeler, temeki tuqyldary, saǵyz jáne qaǵaz qıyqtary kiredi. Qazan aıynda jańartylǵan qaýly kúshine engennen keıin, tyıym salynǵan zattardyń qataryna tamaq konteınerleri men bir ret qoldanylatyn aǵash taıaqshalar qosylady.
Buǵan deıin bıyl Qazaqstanda 2 637 zańsyz qoqys orny anyqtalyp, 83%-y joıylǵany habarlanǵan bolatyn.
Aqzat Jıenalına
