Tokıoda kóshedegi 2,7 mln dollardy quraıtyn asa iri tonaý isi tergelip jatyr
ASTANA. KAZINFORM – Tokıo polıtsııasy el astanasynyń qaq ortasynda jasalǵan asa batyl tonaý deregi boıynsha tergeý júrgizip jatyr. Qylmyskerler ishinde shamamen 420 mln ıen (2,7 mln dollar) qolma-qol aqsha bolǵan chemodandardy alyp qashyp ketken, dep habarlaıdy Kyodo.
Oqıǵa beısenbi kúni keshke Ýeno aýdanynda bolǵan. Úsh adamnan turatyn top jeti adamǵa shabýyl jasap, jábirlenýshilerdiń aıtýynsha, ishinde shamamen 420 mln ıen bolǵan chemodandardy alyp ketken.
Kúdiktiler oqıǵa ornynan ketip bara jatqan sátte avtokólikpen shamamen 50 jastaǵy er adamdy qaǵyp ketken. Keıinirek sol aýmaqtan shaǵyn kók tústi jeńil kólik tabyldy. Jaıaý júrginshi jeńil jaraqat alǵan.
Tergeý derekterine sáıkes, úsh kúdikti keıinirek aq tústi fýrgonǵa otyrǵan bolýy múmkin. Fýrgondy taǵy bir adam basqarǵan. Bul kólik qylmystyq toppen baılanysy bar tulǵanyń atyna tirkelgeni anyqtaldy.
Birneshe saǵattan keıin, juma kúni tańǵa jýyq, taǵy bir oqıǵa tirkeldi. Haneda áýejaıy avtoturaǵynda belgisiz adamdar burysh gazyn qoldanyp, sómkesinde 190 mln ıen qolma-qol aqshasy bar er adamǵa shabýyl jasaǵan. Alaıda bul joly aqsha qoldy bolmaǵan.
Zardap shekken azamat jeńil jaraqat alǵanymen, keıinirek aqshamen birge Gonkong qalasyna ushyp ketken.
Tergeýshiler eki oqıǵanyń ózara baılanysty ekenin joqqa shyǵarmaıdy. Eki jaǵdaıda da jábirlenýshiler qolma-qol aqshany gonkong dollaryna aıyrbastaý úshin Haneda áýejaıynan Gonkongqa jetkizbek bolǵandaryn aıtqan.
Oqıǵa Japonııadan tys jerde de jalǵasyn tapty. Gonkong BAQ-tarynyń málimetinshe, juma kúni tańerteń Sheng-Van aýdanyndaǵy valıýta aıyrbastaý pýnkti mańynda eki er adam tonalyp, ishinde 58 mln ıen bar rıýkzaktarynan aıyrylǵan. Aldyn ala málimet boıynsha, olar Japonııa azamattary bolýy múmkin.
Gonkong polıtsııasy juma kúni keminde bir kúdiktiniń ustalǵanyn habarlady, alaıda aıyp taǵý men istiń egjeı-tegjeıi jarııalanǵan joq.
Tokıo polıtsııasy Haneda áýejaıynan aqshamen ushyp ketken er adam Gonkongta qaıta shabýylǵa ushyraýy múmkin degen nusqany da tekserip jatyr.
Aıta keteıik, Lývrdaǵy urlyqtan keıin Frantsııada qaýipsizdik júıesi kúsheıtiledi.