Tokıoda koronavırýske shaldyqqandarǵa robottar qyzmet etedi
NUR-SULTAN. QazAqparat – Tokıoda koronavırýs juqtyrǵandar úshin arnaıy qonaqúı ashyldy. Saqtyq maqsatynda onda robottar ǵana qyzmet etedi, dep habarlaıdy QazAqparat «Habar 24» arnasyna silteme jasap.
Temir qyzmetkerler tazalaý jáne zararsyzdandyrý jumystaryn júrgizedi. Sondaı-aq naýqastardyń em-domyna kómektesedi.
«Qonaqúıdi meılinshe jaıly etý úshin robottardy qoldanýdy uıǵardyq. Máselen, meımanhananyń kireberisine tazalaý jumysymen aınalysatyn robotty qoıdyq. Óıtkeni eń qaýipti aımaq dál osy jer sanalady. Onyń ústine robottardyń arqasynda adamdar vırýs juqtyryp alamyn dep te qoryqpaıdy», - deıdi Tokıo merııasynyń ókili Naoko Kýbota.
Óz kezeginde Túrkııa qonaqúıleri saqtyq sharalaryn meılinshe kúsheıtip, turalap turǵan týrızm salasyn qaıta jandandyrýǵa kiristi. ıAǵnı qonaqúıler budan bylaı tek «qaýipsizdik sertıfıkatymen» jumys isteıdi. Al kelýshiler koronavırýs juqtyrmaǵany týraly anyqtama kórsetýleri kerek. Buǵan qosa, áleýmettik araqashyqtyqty saqtaý da mindetti. Osyǵan baılanysty qyzmetkerlerge arnaıy epıdemıologııalyq daıarlyqtan ótý talaby qoıyldy.
«Qaýipsizdik sertıfıkaty berilgen sáttep bastap qyzmetkerlerdi daıyndaýǵa kirisemiz. Cheshmedegi maýsym tek barlyq talaptarǵa saı bolǵanymyzda ǵana bastalady. Turǵyn úıdi jalǵa berý servısinde de birshama ózgeris bar. Mamyrdan bastap páter ıeleri bólmeni tazalaý jumystaryna qonaq ketkennen keıin 24 saǵattan soń ǵana kirise alady. Buǵan qosa, úıdi kelesi jalǵa alýshyǵa tapsyrý úshin keminde 3 táýlik ótýi tıis», - Cheshme qalasynyń meri Ekrem Oran.
Koronavırýs kesirinen Nıý-Iork qonaqúıleri de kelýshilerge jańa shekteýler engizýge májbúr. Endi meımanhana tabaldyryǵynan attaǵan árbir qonaq mindetti túrde dene qyzýyna tekserilýi tıis. Al lıftpen tek bir adamnan ǵana kóterile alady. Buǵan qosa, bólmelerdi tazalap, dezınfektsııalaýǵa beriletin ýaqyt ádettegi 2 saǵattan 3 táýlikke deıin uzarǵan.
«Biz kelgen qonaqtardyń temperatýrasyn tekserip, hal-jaǵdaıyn suraımyz. Eger bári durys bolsa, qoldaryna zararsyzdandyrǵysh ustatyp, tolyq tekserilgeni týraly stıker beremiz. Mundaı qaǵazdyń túsi kún saıyn ózgertilip turady. Biz jańadan engizilip jatqan sharalar adamdarǵa túsinikti bolýy úshin barynsha qarapaıym etýge kúsh saldyq», - deıdi qonaqúı menedjeri Rýdı Taýsher.
Foto: twitter.com/TPM
