Tokıoda Qazaqstannyń ınvestıtsııalyq múmkindikteri tanystyryldy
Mitsubishi UFG Financial Group Inc. japon holdıngtik kompanııasynyń Tokıodaǵy Qazaqstan Elshiligimen birlesip uıymdastyrǵan is-sharasyna holdıngtiń korportıvtik klıentteri bolyp tabylatyn 150-den astam japon kompanııalarynyń jáne ekonomıkalyq uıymdardyń, atap aıtqanda tanymal Sumitomo, Mitsui, Marubeni, Sojitz, NEC, Hitachi sııaqty TUK men t.b. ókilderi qatysty.
Elshi Erlan Baýdarbek-Qojataev sózinde ótken jylǵy Prezıdent Nursultan Nazarbaevtyń Japonııaǵa saparynyń Qazaqstan-Japonııa qarym-qatynastaryn keńeıtilgen strategııalyq áriptestiktiń jańa sapaly deńgeıine kótergenin atap ótti. Ol semınar qatysýshylaryna ekonomıkalyq jańǵyrýdyń jáne shetel ınvestorlaryn tartýǵa qatysty Qazaqstan Úkimeti strategııasynyń basymdyqtaryn tanystyrdy.
«Kazakh Invest» UK» AQ-nyń Basqarýshy dırektory Baqyt Qusaıynov elimizdiń ınvestıtsııalyq klımaty men bıznes júrgizý úshin baǵdar izdestirý barysynda kompanııa tarapynan shetel ınvestorlaryna kórsetiletin járdem jóninde aıttyp ótti.
Almaty qalasyndaǵy Bank of Tokyo UFJ ókildiginiń basshysy Hıdeıýkı Asano bank bólimshesi qyzmetiniń tájirıbesimen bólisip, Qazaqstandaǵy iskerlik áriptestikti damytýǵa japon bıznesiniń múddeliligin atap kórsetti.
Almatydaǵy Toyota Tsusho kompanııasy ókildiginiń basshysy Nobýıýkı Arakava Qazaqstanda oıdaǵydaı júrgizilip otyrǵan qyzmeti jóninde aıtyp, qazaqstandyq kompanııalarmen birlesken jobalardy odan ári ilgeriletýge qyzǵýshylyǵyn bildirdi.
PwC kompanııasy klıenttermen jumys isteý departamentiniń dırektory Masahıko Itoı sóz sóıleýinde salyq preferentsııalary, syrtqy saýda rejıminiń yryqtandyrylýy, arnaıy ekonomıkalyq aımaqtar týraly atap ótti.
Qatysýshylardyń pikirinshe, ótkizilgen semınar Qazaqstannyń ekonomıkalyq jáne ınvestıtsııalyq múmkindikterin tanystyrýǵa, sondaı-aq eki eldiń bıznes-qoǵamdastyqtary arasyndaǵy ózara paıdaly yntymaqtastyqty ornatý perspektıvalaryn talqylaýǵa arnalǵan tıimdi alańǵa aınaldy.
