Tokıoda qazaq ulttyq ortalyǵy ashyldy

TOKIO. QazAqparat - Qazirgi ýaqytta Japonııada turaqty negizde jumys istep jatqan jáne bilim alyp júrgen Qazaqstan Respýblıkasynyń 191 azamaty, sondaı-aq Qytaı, Mońǵolııa jáne Ózbekstannan kelgen 70-ke jýyq etnıkalyq qazaq turady. Endi olar birlesip,óz uıymdaryn quryp otyr, dep habarlaıdy QazAqparat «Otandastar qoryna» silteme jasap.

Japonııadaǵy qazaqtar qaýymdastyǵynyń tóraǵasy bolyp «Juntendo» ýnıversıtetiniń klınıkasynda hırýrg bolyp jumys isteıtin qandas Ábdibek Qalybek saılandy.

Búgin «Otandastar qory» KEAQ jáne Japonııa qazaqtary qaýymdastyǵy ózara yntymaqtastyq týraly memorandýmǵa onlaın rejımde qol qoıdy.

Memorandým aıasynda mádenı-gýmanıtarlyq jobalardy iske asyrý, kásipkerler arasynda ózara baılanysty jolǵa qoıý jáne aqparattyq qoldaý jumystary josparlanýda.

Іs-sharaǵa QR Japonııadaǵy Tótenshe jáne Ókiletti Elshisi Erlan Baýdarbek-Qojataev jáne osy elde turatyn etnıkalyq qazaqtar, oqyp jatqan stýdentter de qatysty.

«Otandastar qorynyń» vıtse-prezıdenti Maǵaýııa Sarbasov óz sózinde sheteldegi otandastarmen baılanystardy keńeıtýdiń mańyzdylyǵyn atap ótip, olardyń tildik jáne etnomádenı biregeıligin saqtaýǵa yqpal etetin Qoǵam baǵdarlamalary týraly habardar etti.

Taraptar qazaq tilin oqytý boıynsha qysqa merzimdi kýrstardy júzege asyrýǵa, Qazaqstannyń joǵary oqý oryndarynda qazaq balalarynyń bilim alýyna jan-jaqty qoldaý kórsetýge, qazaq qolónerin damytý jáne ilgeriletý baǵytynda qoldaýdy qamtamasyz etýge, Japonııa jáne Qazaqstan kásipkerlerimen kezdesýler, semınarlar, konferentsııalar jáne bıznes-forýmdar uıymdastyrýǵa kómek kórsetýge kelisti.