Tokıoda aptap ystyqtan 260-tan astam adam aýrýhanaǵa tústi
ASTANA. KAZINFORM — Japonııa astanasy Tokıoda kúnniń kúrt ysýyna baılanysty 261 adam aýrýhanaǵa jetkizildi. Aptap ystyq kezinde jedel járdem qyzmetine túsken shaqyrtýlar sany da buryn-sońdy bolmaǵan deńgeıge jetti, dep habarlaıdy Kyodo .
Bul – 2022 jyldan beri júrgizilip kele jatqan statıstıkadaǵy eń joǵary táýliktik kórsetkish. Sonymen qatar bir táýlikte qutqarý qyzmetine 3 454 jedel shaqyrtý túsken. Bul – mundaı esep júrgizile bastaǵan 1963 jyldan bergi rekord kórsetkish.
Qutqarý qyzmetiniń málimetinshe, demalys kúnderindegi aptap ystyqtan keıin densaýlyǵy syr bergenderdiń sany kúrt artqan. Turǵyndar dene qyzýynyń kóterilýi, bas aýrýy jáne jalpy álsizdikke shaǵymdanǵan.
Aýrýhanaǵa túskenderdiń basym bóligi – egde jastaǵy adamdar. Olardyń ishinde 55 adam 80 jastan assa, taǵy 53 adam 70 jasta. Sondaı-aq zardap shekkenderdiń arasynda jasy elýdi eńsergen 27 adam bar.
Japonııanyń meteorologııalyq agenttiginiń málimetinshe, seısenbi kúni Tokıonyń ortalyǵynda aýa temperatýrasy 36,4 gradýsqa deıin kóterilgen. Al sársenbi kúni eldiń keıbir óńirlerinde synap baǵanasy qatarynan ekinshi kún 40 gradýstan asty.
Aptap ystyq Totıgı prefektýrasynyń Otavara qalasynda turatyn 84 jastaǵy er adamnyń ólimine sebep bolýy múmkin. Jergilikti órt sóndirý qyzmetiniń málimetinshe, ony plastık jylyjaıdan týysy es-tússiz kúıde taýyp alǵan. Dárigerler er adamdy aýrýhanaǵa jetkizgenimen, aman alyp qala almady.
Aptap ystyq sport jarystaryna da áser etti. Saıtama qalasynda beısboldyń tómengi lıgasyndaǵy matchtardyń biri ótpeı qaldy. Al Lotte Marines pen Orix Buffaloes klýbtarynyń qosalqy quramdary arasyndaǵy oıyn tórtinshi ınnıng kezinde toqtatylyp, keıin jaramsyz dep tanyldy.
Japonııanyń meteorologııalyq agenttigi turǵyndardy kúnniń aptap ýaqytynda syrtta uzaq júrmeýge, jetkilikti mólsherde sý ishýge jáne densaýlyq jaǵdaıyn jiti baqylaýǵa úndedi.
Eske salaıyq, buǵan deıin Japonııanyń 41 prefektýrasynda aptap ystyqqa baılanysty eskertý jarııalaǵanyn habarlaǵanbyz.
