Tokıo, Vena, Nıý-Iork: Qazaqstannan áýe qatynasy keńeıedi
ASTANA. KAZINFORM — Jaqynda Almatydan Tokıoǵa tikeleı reıs ashylyp, Vena, Nıý-Iork jáne Mılan baǵyttary boıynsha áýe qatynasy jolǵa qoıylady. Sonymen birge, elde úsh jańa áýejaı salynyp, qoldanystaǵy áýe aılaqtary jańǵyrtylyp jatyr. Bul týraly Premer-mınıstrdiń birinshi orynbasary Nurlybek Nálibaev aıtyp berdi.
Vıtse-premerdiń aıtýynsha, áýe tranzıttik áleýetti arttyrý úshin ushý-qoný jolaqtary men termınaldar jóndelip, jerústi ınfraqurylymyn jańǵyrtý jumystary júrgizilýde.
— Qazir Almaty jáne Úrjar áýejaılary jańǵyrtylyp, Shymkentte ekinshi ushý-qoný jolaǵy salynyp jatyr. Bıyl tamyz aıynda Pavlodar áýejaıynyń ushý-qoný jolaǵy qaıta jańǵyrtylyp, Arqalyq áýejaıy ashyldy. Memleket basshymyzdyń tapsyrmasy boıynsha Zaısan, Katonqaraǵaı jáne Kendirlide úsh áýejaı salynyp jatyr. Olardyń qurylysy 2026 jyldyń sońyna deıin aıaqtalady, — dedi Nurlybek Nálibaev Úkimette ótken baspasóz máslıhatynda.
Bıyl 30 qarashada Almaty-Tokıo baǵytynda birinshi áýe reısi ashylady. Al keler jyly Vena, Nıý-Iork, Mılan jáne basqa da jańa áýe baǵyttary ashylady.
— Negizgi avıatsııalyq habtar aıqyndaldy. Bul habtarda arnaıy ekonomıkalyq aımaqtar rejımi engizilip, janarmaı quıý keshenderi men júk termınaldary jańǵyrtylýda, mýltımodaldy tasymaldaý qaǵıdattaryna sáıkes temirjol jáne avtomobıl joldary tartylýda. Aeronavıgatsııalyq qamtamasyz etý júıesin ozyq halyqaralyq jabdyqtar men standarttar negizinde jańǵyrtý bastaldy, — dedi Premer-mınıstrdiń birinshi orynbasary.
Sonymen birge, ulttyq júk áýe tasymaldaýshysy — «Eır-Kargo» quryldy. Kompanııanyń alǵashqy áýe kemesi osy jyldyń qarasha aıynda, al ekinshisi naýryz aıynda jetkiziledi. Áýe kemeleri parkiniń jalpy sany 10 júk ushaǵyn quraıdy.
Kólik salasyn tolyq tsıfrlandyrý maqsatynda «E-Kólik» biryńǵaı zııatkerlik platformasynyń negizinde aqparattyq júıeler ıntegratsııalanýda. Atalǵan platforma arqyly qaǵazsyz qujat aınalymyna tolyq kóshý, qujattardy resimdeý merzimderin qysqartý jáne júk aǵyndarynyń ashyqtyǵyn arttyrý qamtamasyz etiledi.
Buǵan deıin Nurlybek Nálibaev «Aýqymdy qurylys» qarajatynyń naqty qaı salalarǵa bólinetinin aıtyp berdi.
Eýrazııanyń kólik-logıstıka haby ataný úshin júk tasymaldaýshylarǵa jaǵdaı jasalady.
