Tokıo týrnıri: Pýtıntsevany jeńgen Rybakına shırek fınalǵa shyqty
ASTANA. KAZINFORM — Qazaqstannyń jáne álemniń 1-raketkasy Elena Rybakına Tokıo (Japonııa) WTA 500 týrnıriniń shırek fınalyna joldama aldy.
Jarystyń 1-raketkasy bolyp tirkelip, ekinshi aınalymnan bastaǵan E.Rybakına álemdik reıtıngide 67-oryndaǵy otandasy ıÝlııa Pýtıntsevamen betpe-bet keldi.
Qarsylastar osyǵan deıin ózara tórt ret kezdesken, esep teń edi — 2:2.
Bul joly birinshi partııada Rybakına 4:1 esebimen alǵa shyqty. Sosyn taǵy bir breıkpen támamdady — 6:2.
Ekinshi sette de esep 2:1 bolǵan mezette Elena breık jasaı bildi. Aqyry matchty jeńispen túıindedi — 6:3.
Bir saǵat 10 mınýtqa sozylǵan báseke barysynda Rybakına 6 eıspen birge 5 breık-poınttyń úsheýin óz esebine jazdy. Pýtıntseva 1 eıspen shekteldi.
Osylaısha, E.Rybakına keıingi oıyndardyń nátıjesine qaramastan, jyldyń qorytyndysy boıynsha álemniń 1-raketkasy ataǵyn saqtap qalatyn boldy.
Elena Rybakına Tokıoda jartylaı fınalǵa shyǵý úshin álemniń 23-raketkasy, kanadalyq Leıla Fernandespen sheberlik talastyrady.
Ótken aptada qazaqstandyq tennısshi Nınbo (Qytaı) WTA 500 dodasynyń fınalynda L.Fernandesti 6:2, 6:2 esebimen tize búktirgen edi.
Eske sala keteıik, budan buryn Tokıo týrnırinde grekııalyq tennısshini utqan Pýtıntsevanyń Rybakınamen oınaıtynyn jazǵan edik.
Sondaı-aq Jibek Qulambaeva Qytaıdaǵy jarystyń jartylaı fınalyna joldama aldy.
