Tokıo Sýrdlımpıadasynda el namysyn 79 sportshy qorǵaıdy

ASTANA. KAZINFORM — 2025 jylǵy 15–26 qarashada Tokıo qalasynda ótetin XXV jazǵy Sýrdlımpıada oıyndarynda Qazaqstan atynan 79 sýrdosportshy qatysady.

— Sýrdosportshylar elimizdiń abyroıyn halyqaralyq arenada abyroımen qorǵap keledi. Táýelsizdik jyldary ishinde Qazaqstan sportshylary segiz jazǵy jáne qysqy Sýrdlımpıadada 42 medal, onyń ishinde 8 altyn, 8 kúmis jáne 26 qola medal jeńip aldy. 2022 jyly Brazılııada ótken oıyndarda ulttyq quramamyz 29 medal ıelenip, jalpykomandalyq esepte 13-orynǵa ıe boldy. Bıyl Qazaqstan jetinshi ret jazǵy Sýrdlımpıada oıyndaryna qatyspaq, — dedi Ulttyq sýrdlımpıadalyq komıtettiń prezıdenti Serik Sapıev.

Sport jáne dene shynyqtyrý isteri komıteti Múmkindikteri shekteýli tulǵalarmen jumys basqarmasynyń basshysy Marat Qasqyrbaevtyń málimetinshe, Tokıoda ótetin jarystarda elimizdiń namysyn 79 sportshy jeńil atletıka, dzıýdo, taekvondo, ústel tennısi, badmınton, júzý, erkin jáne grek-rım kúresinen qorǵaıdy.

Aıta keteıik, búginde respýblıkada dene múmkindikteri shekteýli adamdarǵa arnalǵan 16 sport klýby, 1 sportty damytý dırektsııasy (Almaty oblysynda) jáne 2 mamandandyrylǵan sport mektebi (Shymkent qalasy men Qaraǵandy oblysynda) jumys isteıdi. Atalǵan uıymdar Almaty, Abaı, Túrkistan, Jambyl, Batys Qazaqstan, Mańǵystaý, Soltústik Qazaqstan, Pavlodar, Shyǵys Qazaqstan, Aqmola, Qostanaı, Aqtóbe, Atyraý, Jetisý, Qyzylorda oblystarynda jáne Astana qalasynda ornalasqan. Olarda barlyǵy 7 532 sportshy turaqty túrde jattyǵady.

Buǵan deıin paralımpıada, sýrdlımpıada júldegerlerin daıyndaǵan jattyqtyrýshylar arnaıy tólem alatynyn jazǵan edik.