Tokıo sý astyna ketedi
ASTANA. 1 qazan. QazAqparat - Japonııaǵa tóngen «Djelavat» daýylynyń saldarynan kem degende 100 adam zardap shegip, 1-eýi qaza boldy, dep habarlady Ýtro. rý.
Tabıǵı apattyń negizgi soqqysy Honsıý aralynyń ortalyǵyna keldi. Saǵatyna 50 shaqyrymdy quraıtyn jeldiń ekpini jáne nóserli jańbyrlar elektr taratý jelilerin zaqymdady, saldarynan 300 myńnan astam úı jaryqsyz qaldy, dep habarlady Sky News.
Osy ýaqytta «Djelavat» astanalyq óńirge qaraı baǵyt aldy. Japonııanyń bılik ókilderi 100 myńnan astam adamdy qaýipsiz aımaqqa kóshirý jóninde aqparat taratty. Alapat daýyl Tokıoǵa dúısenbi kúni keshke qaraı jetedi dep kútilýde.
Japonııadaǵy «Djelavattyń» saldarynan 600 avıareıs keıinge shegerildi. Temirjol qozǵalysy da toqtatyldy. Mamandar ózender arnalarynan tasyp, sý tasqynyn týdyrady dep sekem alýda.
Daýyl keltirgen shyǵynnyń kólemin oqıǵa kýágerleri ǵalamtorǵa salyp jatqan beınerolıkterden kórýge bolady. Olardyń birinen jeldiń kólikti aýaǵa kóterip, birneshe ondaǵan metrlerge deıin ushyryp áketkenin kórýge bolady.
Esterińizge sala keteıik, basqa BAQ-dyń taratqan habarlamalary boıynsha «Djelavat» daýyly japondyq Okınava prefektýrasyna tóndi, ol 17 myńnan astam úıdi jaryqsyz qaldyrdy. «Djelavat» bıyl Japonııanyń jaǵalaýyna jetken 17-shi daýyl boldy.
