Tokıo Olımpıadasynyń júldegerleri Zýlfııa Chınshanlo men Igor Son baspanaly boldy

TALDYQORǴAN. QazAqparat - Taldyqorǵanda Olımpıada júldegerlerine baspana syıǵa tartyldy,- dep habarlaıdy QazAqparat.

Aýyr atletterge eki jáne úsh bólmeli páter sertıfıkattaryn óńir basshysy Amandyq Batalov saltanatty túrde tabystady. Sondaı-aq sportshylardy baptaǵan jattyqtyrýshy Sergeı Sedovqa 2 mln teńge syıaqy berildi. Kúnshyǵys elinde Qazaqstannyń kók baıraǵyn jelbiretken qos sportshynyń jetistikteri Jetisý halqynyń da abyroıyn asqaqtatqanyn atap ótken oblys ákimi atletterdiń óz sheberligin shyńdaýǵa barlyq jaǵdaı jasaýǵa ýáde berdi.

Sportshylar óz kezeginde bul nátıjemen toqtap qalmaı áli de eńbektenip, Parıj Olımpıadasynda óner kórsetýge kúsh salatynyn jetkizdi.

Aıta ketý kerek Tokıo Olımpıadasyna Almaty oblysynan 10 sportshy qatysqan bolatyn.

«Bir jyldan keıin Azııa oıyndary ótedi. Azdaǵan jaraqattarym bar. Solardy emdep alyp, osy qurlyq dodasyna daıyndalam. Odan keıin Parıj Olımpıadasy. Bári oıdaǵydaı bolsa sol jarystan «altyn» alamyn degen ózime úlken maqsat qoıyp otyrmyn»,- dedi Tokıo Olımpıadasynyń qola júldegeri Igor Son.