Tokıo olımpıadasynyń joldamasyn jeńip alǵym keledi – Nazym Qyzaıbaı

NUR-SULTAN. QazAqparat – Shymkent qalasynda áıelder arasynda bokstan el chempıonatynyń fınaldyq básekesi ótip jatyr, dep habarlaıdy QazAqparat tilshisi.

Áıelder arasynda sharshy alańǵa alǵashqy bolyp shyqqan Jambyl oblysynyń ókili Alýa Balqybekova 48 kg salmaqta elordalyq Araılym Maratty jeńip, chempıon atandy.

Olımpıadalyq salmaq bolyp esepteletin 51 kelide almatylyq Nazym Qyzaıbaı sharshy alańdaǵy negizgi qarsylasy, shymkenttik Angelına Lýkastan basym túsip, jeńis tuǵyryna kóterildi.

Taǵy bir olımpıadalyq salmaq – 57 kelide qostanaılyq Vladıslava Kýhta tájirıbeli qarsylasy, qaraǵandylyq Aıjan Hodjabekovany utyp, jeńimpaz atandy.

54 kg salmaqta Almaty oblysynyń ókili Balaýsa Muzdımandy utqan aqmolalyq Dına Jolaman onynshy márte el chempıony atandy.

Qazaqstan tarıhynda qyzdar arasynda tuńǵysh ret álem chempıony atanyp, sodan keıin taǵy bir márte top jarsa da, N. Qyzaıbaıǵa buǵan deıin olımpıadaǵa qatysý baqyty buıyrmaǵan edi.

Nazym jekpe-jekten keıingi suhbatynda Tokıo olımpıadasynyń joldamasyn jeńip alyp, el mereıin ústem etý úshin baryn salatynyn málimdedi.

Fınaldyq báseke odan ári jalǵasýda.

Eske sala keteıik, budan buryn fınalǵa shyqqan boksshylardyń anyqtalǵanyn jazǵan bolatynbyz.