Tokıo Olımpıadasynyń qashan ótetini belgili boldy

NUR-SULTAN. QazAqparat – Tokıo Olımpıadasy kelesi jyldyń 23 shildesi men 8 tamyzy aralyǵynda ótedi, dep habarlaıdy QazAqparat tilshisi Ulttyq olımpıada komıtetine silteme jasap.

Osylaısha Halyqaralyq olımpıada komıteti, Halyqaralyq paralımpıada komıteti, Tokıo-2020 oıyndaryn uıymdastyrý komıteti, sondaı-aq, Tokıo qalasy men Japonııa bıligi Olımpıada oıyndary ótetin jańa merzimdi bekitti.

Búgin telefon arqyly ótken jıynǵa HOK prezıdenti Tomas Bah, Tokıo-2020 prezıdenti Morı Ioshıro, Tokıo gýbernatory Koıke ıÝrıko, Olımpıada jáne Paralımpıada oıyndarynyń mınıstri Hasımıto Seıko qatysty.

Jańa sheshimdi qabyldaý barysynda taraptar 2020 jyldyń 17 naýryzynda HOK atqarýshy komıteti bekitken negizgi úsh qaǵıdany ustandy. 1. Sportshylar men barlyq qatysýshylardyń densaýlyǵyn saqtaý, sonymen qatar, COVID-19 indetiniń tejelýin qoldaý; 2. Sportshylar men olımpıadalyq sport túrleriniń ustanymyn qorǵaý; 3. Ǵalamdaǵy halyqaralyq sport kúntizbesi.

Jıyn barysynda jazǵy sport túrlerindegi barlyq halyqaralyq federatsııalar men ulttyq olımpıada komıtetteri qabyldanǵan sheshimdi qoldady.

Aıta ketelik, 24 naýryz kúni álemde COVID-19 indetiniń taralýyna baılanysty Japonııa bıligi men HOK birlese otyryp, Olımpıada oıyndaryn kelesi jylǵa qaldyrý týraly sheshim qabyldaǵan edi.

Osylaısha, jańadan bekitilgen merzimge sáıkes Tokıo Olımpıadasy 2021 jyldyń 23 shildesi men 8 tamyzy aralyǵynda ótedi. Paralımpıada oıyndary 24 tamyz ben 5 qyrkúıek aralyǵynda uıymdastyrylady.

Eske sala keteıik, budan buryn Olımpıada oıyndary kelesi jylǵa qalǵanyn jazǵan bolatynbyz.