Tokıo Olımpıadasyndaǵy tuǵyrlar qaıta óńdelgen plastıkten jasaldy

TOKIO. Kyodo-QazAqparat – Tokıoda ótetin Olımpıada jáne Paralımpıada uıymdastyrýshylary jýrnalısterge marapattaý rásiminde paıdalanylatyn qaıta óńdelgen plastıkten jasalǵan tuǵyrlardy kórsetti. Bul týraly QazAqparat Kyodo agenttigine silteme jasap habarlaıdy.

Bul tuǵyrlar qaıta óńdelgen bótelkelerden, sonymen qatar teńizden shyǵarylǵan plastık qoqystardan ázirlendi. Budan bólek, Olımpıada jáne Paralımpıada oıyndaryndaǵy tuǵyrlarǵa ornatylǵan emblemalardy jasaýda 2011 jyly bolǵan jer silkinisi kezinde qulaǵan turǵyn úılerden qalǵan alıýmınıı paıdalanylǵan. Osy materıaldardyń arqasynda uıymdastyrýshylar «turaqty ómir súrý» qaǵıdasyn júzege asyrdy. Bul, sonymen qatar, Tokıoda ótetin oıyndardyń tujyrymdamalarynyń biri, dep atap ótedi Kıodo.

Aıta ketsek, Olımpıadalyq oıyndar 2021 jyldyń 23 shildesi men 8 tamyzy aralyǵynda ótedi, al Paralımpıadalyq oıyndar - 24 tamyz ben 5 qyrkúıek aralyǵynda.