Tokıo Olımpıadasynda koronavırýs juqtyrǵan adam sany 250-ge jýyqtady

NUR-SULTAN. QazAqparat - Ótken táýlikte Olımpıadada taǵy 21 adamnyń koronavırýsqa tapsyrǵan testi oń nátıje kórsetti, dep habarlaıdy QazAqparat Habar24kz saıtyna silteme jasap.

Sóıtip, dúbirli doda qatysýshylary men delegattary arasyndaǵy vırýs juqtyrý oqıǵalary 250-ge taıap qaldy.

Jalpy shara ótip jatqan Tokıo halqy arasynda vırýs juqtyrǵandar kóp. Osyǵan baılanysty tótenshe jaǵdaı tártibi 31 tamyzǵa deıin uzartyldy. Sońǵy kezde qalada ahýaldyń nasharlaýy Olımpıadamen baılanysty degen áńgimeler aıtylyp júr. Alaıda osy kúnge deıin shara qatysýshylarynan jergilikti turǵyndarǵa indettiń juǵý deregi tirkelmegen.

Mamandardyń túsindirýinshe, bárine «delta» shtamy sebep. Sondaı-aq vaktsınalaý naýqanynyń baıaý júrýi de áser etken bolýy múmkin.

«Bılik vırýstyń taralýyn tejeý úshin tótenshe jaǵdaı tártibin uzartty. Alaıda onyń paıdasy shamaly sııaqty. Óıtkeni bul tártipke qaramastan meıramhanalar jumys istep tur. Adam kóp. Menińshe, bılik turǵyndardyń júris-turysyn shekteýi kerek. Múmkin sonda bul shara óz tıimdiligin kórsetetin shyǵar»,-deıdi jergilikti turǵyn Naokı Tamýra.