Tokıo Olımpıadasyna sheteldikterge satylǵan bıletterdiń baǵasy qaıtarylady

TOKIO. QazAqparat – Tokıodaǵy jazǵy Olımpıada oıyndary sheteldik kórermensiz ótedi. «QazAqparat» HAA tilshisi bul týraly Kyodo-ǵa silteme jasap habarlaıdy.

Japonııanyń Oıyndardy uıymdastyrý komıtetinen málim etkendeı, sheteldik jankúıerlerge bılet quny qaıtarylady.

Tokyo Games uıymdastyrýshylary 4,5 mıllıonǵa jýyq bıletti ishki lotereıa arqyly satqan. Alaıda ótken jyly 800 myńnan astam bıletti qaıtarý jóninde ótinim túsken.

Kyodo-nyń jazýynsha, shet memleketterde Tokıodaǵy Olımpıada oıyndaryna 1 mıllıonǵa jýyq bılet satylyp úlgergen.

Eske salaıyq, Tokıo Oıyndary bıyl 23 shilde – 8 tamyz aralyǵynda, Paralımpıada oıyndary 24 tamyz – 5 qyrkúıek kúnderi ótedi.

Japonııa bıligi Olımpıada oıyndaryn sheteldik kórermensiz ótkizý sheshimin qabyldaǵany týraly buǵan deıin jazǵan bolatynbyz.