Tokıo Olımpıadasyna qatyssa Ilınniń basty qarsylastary kim bolýy múmkin
ASTANA. QazAqparat - Joly bolyp 2020 jyly Tokıo jazǵy Olımpıadasyna bara qalǵan jaǵdaıda álemniń tórt dúrkin chempıony Ilıa Ilınniń negizgi qarsylastary kim bolýy múmkin? Astanadaǵy OKQ-da ótken baspasóz máslıhatynda osy suraqqa jaýap bergen sportshynyń ózi 105 kelige deıingi salmaqta qaı eldiń sportshylaryn basty básekeles retinde kórip otyrǵanyn atap ótti, dep habarlaıdy «QazAqparat» HAA tilshisi.
Saýalǵa jaýap bere kele Ilıa Ilın Tokıo Olımpıadasyna deıin taǵy bir úlken asý - Álem chempıonaty turǵanyn tilge tıek etti. Onyń aıtýynsha, 105 kelige deıingi salmaqta kil myqtylardyń ishinen qara úzip shyǵý ońaı bolmaıdy.
«Árıne, Olımpıadanyń aýylyna áli de óte kóp ýaqyt bar. Biraq, qazir kóptegen sportshylar jınalyp jatyr. Shyndyǵyn aıtqanda, meniń oıymsha, kelesi Álem chempıonatynda 105 kelige deıingi salmaqta óner kórsetýim múmkin. Kelesi Álem chempıonatynda Rýslan Nýrıddınov (Ózbekstan), Andreı Arıamnov (Belarýs, Beıjiń Olımpıdasanyń chempıony) keledi. Estýim boıynsha Andreı qatty daıyndalyp jatqan kórinedi. Bir sózben, ol jaqta eki, al eger men qatyssam úsh Olımpıada chempıony bolady. Reseıden Davıd Bedjanıan bar. Olar Almatyda ótken Álem chempıonatynda komandasymen úlken báseke kórsete bilgen edi. Ol julqa kóterýde rekordsmen. Demek, myqty degen tórteýimiz shyǵýymyz múmkin. Olardan kem óner kórsetpeıtin bizdiń Sasha (Aleksanda - avt.) Zaıchıkov bar. Demek, beseýmiz», - deıdi sportshy.
Ilıa Ilın atalǵan bes sportshy bara qalsa, kil myqtylardyń bári de Álem chempıony atanýǵa baryn salatynyn aıtady. Buǵan qosa atalǵan chempıondardan da jas býynnan taǵy «men» degen 2-3 adam shyǵyp qalýy múmkin.
«Al 94 kelige deıingi salmaqta shyqsam, Álı Hoseını degen jigit bar. Ol jýyqta qınalmaı-aq álemdik básekede top jardy. Demek, onyń salmaǵynda óner kórsetsem, men sol jigitti utýǵa tyrysamyn», - deıdi Ilıa Ilın.
Eske sala ketsek, Ilıa Ilın buǵan deıin dárigerler «aǵzań saı keledi, júrek shydaıdy» dese, 95 paıyzǵa Olımpıadaǵa barý týraly sheshim qabyldaıtynyn málimdegen bolatyn.
