Tokıo Olımpıadasyna qatysatyn atletter kún saıyn testileýden ótedi

TOKIO. Kyodo-QazAqparat – Tokıodaǵy jazǵy Olımpıadanyń uıymdastyrýshylary sáýirdiń aıaǵynda oıyndardy ótkizý erejeleriniń jańa nusqasyn bekitip, onda sportshylardyń kún saıyn koronavırýsqa testileýden ótýi kerektigi týraly tarmaq engizbek. Bul týraly QazAqparat Kyodo agenttigine silteme jasap habarlaıdy.

Qazirgi kezde bul sheshim Halyqaralyq Olımpıada komıtetimen (HOK) kelisilýde. Testterdiń basym bóligi antıgenge tekseredi. Testileý oń nátıje kórsetken jaǵdaıda, dárigerler PTR tásili boıynsha qosymsha zertteý júrgizedi. Atletterden koronavırýs belgileri baıqalsa, olardy birden PTR testin tapsyrýǵa jiberedi. Osyǵan oraı arnaıy olımpıadalyq aýylda bólek zerthana ashylmaq.

Tekseris kestesi oıyndardyń ýaqytyna baılanysty qurylady. Sonymen qosa oıynnyń qandaı da bir kezeńi ótetin kúni sportshylar testileýden bosatylýy múmkin.

Kıodo dereginshe, «Tokıo-2020» uıymdastyrý komıteti 9 mamyrda ótetin jeńil atletıka boıynsha testilik jarystardy kórermendersiz ótkizýdi qarastyrýda.

Tokıodaǵy olımpıadalyq oıyndar 2020 jyldyń 24 shildesi men 9 tamyzy aralyǵyna josparlanǵan edi. Koronavırýs pandemııasyna baılanysty olımpıada bir jylǵa shegerilip, endi 2021 jyldyń 23 shildesi men 8 tamyzy aralyǵynda ótpek.