Tokıo Olımpıadasyna eriktilerdi irikteý bastaldy
ASTANA. QazAqparat - 2020 jyly Tokıoda ótetin Olımpıada jáne Paralımpıada oıyndaryna eriktilerdi qabyldaý bastaldy, dep habarlaıdy Olympic.kz.
Tórtjyldyq dodasynda jalpy esebi 80 myń erikti tańdalady. Onyń ishindegi 20 myń adam sheteldik týrısterge kómek kórsetse, qalǵandary sporttyq nysandarda jumys isteıdi.
2020 jylǵy Tokıo Olımpıadasynyń uıymdastyrý komıteti erikti bolýdyń basty artyqshylyqtaryn atap ótti. Bul - Oıynǵa qoldaý kórsetý úshin taptyrmas múmkindik jáne ómirlik tájirıbe.
«Eriktiler jarys kezinde jáne sporttyq aýyldarda Oıynnyń ajyramas bólshegi bolmaq», - deıdi Tokıo-2020 ókili Masa Takaıa.
Eriktiler 2019 jyldyń qyrkúıegine deıin tańdalady. Al olardy oqytý 2019 jyldyń qazanyna josparlanǵan.
2016 jylǵy Rıo Olımpıadasyna eriktilerden 240 000 ótinim túsken.
Eske sala ketsek, Tokıodaǵy Olımpıada oıyndary 24 shilde men 9 tamyz aralyǵynda ótedi.
