Tokıo Olımpıadasyn qaýipsiz ótkizý: COVID-19 juqtyrýdyń shekti sany belgilendi

TOKIO. QazAqparat – Tokıo qalasy Medıtsınalyq qaýymdastyǵynyń basshysy Harýo Odzakı jazǵy Olımpıada oıyndaryn qaýipsiz ótkizilýin qamtamasyz etý úshin Japonııa astanasynda táýlik ishinde COVID-19 juqtyrý oqıǵalarynyń shekti sany 100-den aspaýy kerek dep sanaıdy. Bul týraly ol beısenbi kúni Asahi Shimbun gazetine bergen suhbatynda málim etti.

Odzakıdiń aıtýynsha, tótenshe jaǵdaıdyń qazirgi rejımi aldyn ala josparlaǵandaı, 31 mamyrda toqtatylatyn bolsa, onda eshqandaı nátıjege qol jetpeıdi.

«Eger oqıǵalar sanynyń ósimi 300-400 deńgeıinde bolǵanda TJ rejımi joıylsa, kelesi eki aıda indet juqtyrýdyń jańa tolqyny bastalýy yqtımal. Oqıǵalar sanynyń ósimin táýligine 100-ge jetkizýge jetý úshin, TJ rejımin maýsymnyń sońyna deıin uzartyp, adamdardyń júrýine shekteý qoıý kerek», - dep qosyp ótti medıtsınalyq qaýymdastyq basshysy.

Sońǵy málimetter boıynsha, qazirgi kezde Japonııada vırýs juqtyrý jaǵdaılarynyń jalpy sany 667 myńnan asqan, 11,2 myńnan astam adam qaıtys boldy.

Aıta ketsek, Tokıodaǵy Olımpıada oıyndary 2020 jyldyń 24 shildesinen bastap 9 tamyzǵa deıin bolýy tıis edi. Pandemııa sebebimen jarystar bir jylǵa keıinge qaldyrylyp, 2021 jylǵy 23 shilde men 8 tamyz aralyǵynda ótkiziletin boldy.