Tokıo Olımpıadasy kórermensiz ótedi

NUR-SULTAN. QazAqparat – Tokıodaǵy Olımpıada oıyndary-2020 jarysyna kórermender jiberilmeıdi. Bul týraly osy jarysty ótkizýge jaýapty japon mınıstri Tamae Marýkava málim etti, dep habarlaıdy QazAqparat Ulttyq Olımpıada komıtetiniń saıtyna silteme jasap.

8 shildede Japonııa astanasynda tamyz aıynyń aıaǵyna deıin sozylatyn tótenshe jaǵdaı rejımi engizildi.

Bastapqyda pandemııaǵa baılanysty Olımpıada oıyndaryna sheteldik jankúıerlerdi jibermeýge sheshim qabyldanǵan bolatyn. Endi jarysqa jergilikti kórermender de kele almaıdy. Tokıodaǵy barlyq jarys, saltanatty sharalar, Olımpıadanyń ashylýy men jabylýy kórermensiz ótedi.

«Tokıoda, Kanagavada, Saıtamada jáne Tıbada jarysqa kórermenderdi jibermeý týraly sheshim qabyldandy. Óz kezeginde Mııagı, Fýkýsıma jáne Sıdzýoka prefektýralarynda 10 myń adamǵa deıin ruqsat etilgen jáne adamdar sany nysandar tolymdylyǵynyń 50 paıyzynan aspaýy tıis», - dedi Marýkava.

Eske sala keteıik, Tokıo Olımpıada oıyndary 23 shilde men 8 tamyz aralyǵynda ótedi.