Tokıo Olımpıadasy alaýynyń estafetasy 121 kúnge sozylady

ASTANA. QazAqparat - 2020 jyly Tokıoda ótetin Olımpıada jáne Paralımpıada oıyndarynyń uıymdastyrý komıteti Tokıo-2020 Olımpıada alaýynyń estafetasy týraly alǵashqy málimettermen bólisti. Bul týraly QazAqparat UOK saıtyna silteme jasap habarlaıdy.

Estafeta kestesine Japonııanyń 47 prefektýrasy enedi. Bul ár aımaqtyń túrli mádenıeti men erekshelikterin álemge pash etýge berilgen úlken múmkindik bolmaq. 

Olımpıada alaýynyń joryǵy 2020 jyldyń 26 naýryzynda Fýkýsıma prefektýrasynan bastalyp, eldiń ońtústigine jol tartady. Uıymdastyrýshylar alaý estafetasy sakýra gúldeıtin kez - sáýir aıynda Japonııanyń ortalyq aımaǵyn basyp ótetinin aıtady. Keıin estafeta Japonııanyń ońtústik-batysyna bet túzep, mamyrdyń basynda eldiń  eń shetki ońtústik núktesindegi prefektýra Okınava araldaryna jetedi. Mamyrdyń ortasynda alaý estafetasy Kıoto arqyly soltústik aımaqtarda ótedi, keıin ońtústikke qaıta oralyp, Tokıoda saparyn aıaqtaıdy. 

Estafeta jalpy esebi 121 kúnge sozylady. Uıymdastyrýshylar komıtetiniń aıtýynsha, alaý estafetasy álem nazaryn Olımpıada oıyndaryna aýdaryp qana qoımaı, 2011 jylǵy jer silkinisinen soń áli kúnge deıin qalpyna keltirý úderisi júrip jatqan aımaqtarǵa iltıpat kórsetýge áserin tıgizbek. Estafetanyń urany - «Úmit bizdiń jolymyzdy sáýlelendiredi».

Alaý estafetasynyń naqty baǵyty jaqyn aılarda tanystyrylyp, 2019 jyly Halyqaralyq Olımpıada komıteti bekitken soń jarııalanady.