Tokıo men Seýldegi Qazaqstan azamattary eń birinshi daýys berdi
«Sheteldegi sheteldik mekemeler janynan 65 saılaý ýchaskesi ashyldy. Qazaqstannyń sheteldik mekemeleri janynda qurylǵan saılaý ýchaskeleri týraly aqparattar baılanys málimetteri kórsetile otyryp, mınıstrliktiń saıtynda jáne basqa da derek kózderinde der ýaqytynda ornalastyryldy», - dedi ol.
R.Vasılenkonyń aıtýynsha, shetel memleketterine qyzmettik, iskerlik nemese týrıstik saparmen barǵan Qazaqstan azamattary saılaý kezinde saılaý ýchaskelerine kelip, tólqujattaryn kórsetkende saılaýshylardyń tizimine engiziledi. Saılaý aldyndaǵy kúngi jaǵdaıǵa sáıkes sheteldegi saılaýshylardyń tizimine shamamen 14 myń azamatymyz tirkelgen.
«Ótken jylǵy prezıdenttik saılaýmen salystyrǵanda saılaýshylardyń sany 6 myń adamǵa kemip otyr. Bul eń birinshi kezekte aldaǵy merekeniń uzaqtyǵyna baılanysty jáne bizdiń otandastarymyz múmkinshilikti paıdalanyp, Naýryz meıramyn týǵan-týystarynyń ortasynda ótkizý úshin Qazaqstanǵa keldi», - dedi R.Vasılenko.
Onyń sózine qaraǵanda, sheteldegi saılaý ýchaskeleri de jergilikti ýaqyt boıynsha tańerteńgi 7.00-den keshki 20.00-de deıin jumys isteıdi. Ýaqyt aıyrmashylyǵyna baılanysty bizdiń azamattarymyz eń birinshi Tokıo men Seýlde ashylǵan saılaý ýchaskelerinde Astana ýaqyty boıynsha tańǵy saǵat 4-te daýys bere bastaǵan.
«Shetelde júrgen azamattarymyz saılaýda belsendilik tanytýda. Astana ýaqyty boıynsha saǵat 12.00-degi jaǵdaıǵa sáıkes shetelde barlyǵy 61 saılaý ýchaskesi ashylyp, olarda 2 myńnan astam otandasymyz daýys berdi. Astana ýaqyty boıynsha saǵat 16.00-de Brazılııada, al odan keıin saǵat 17.00-de Vashıngtonda, Nıý-Iorkte jáne Ottavada daýys berý bastalady», - dedi QR SІM orynbasary.
