Tokıo mańynda magnıtýdasy 5,9 bolatyn jer silkinisi boldy
ASTANA. KAZINFORM — Japonııanyń ortalyq bóliginde magnıtýdasy 5,9 bolatyn jer silkinisi tirkeldi. Onyń epıtsentri Tokıoǵa jaqyn ornalasqan Ibarakı prefektýrasynda bolǵan, dep habarlaıdy TASS.
Jer silkinisinen bolǵan kúshti terbelister shamamen 20 sekýndqa sozylǵan. Tokıoda jıhazdar qozǵalyp, ydys-aıaq qulaǵan.
Japonııanyń ulttyq meteorologııalyq basqarmasynyń málimetinshe, jer silkinisiniń oshaǵy Ibarakı prefektýrasynda, 70 shaqyrym tereńdikte ornalasqan. Jer silkinisinen keıin birden tsýnamı qaýpi jarııalanǵanymen, birneshe mınýttan soń eskertý alynyp tastaldy. Japonııanyń jeti baldyq shkalasy boıynsha jer silkinisiniń kúshi «5-ten tómen» deńgeıinde dep baǵalandy.
Qazirgi ýaqytta zardap shekkender nemese qıraǵan nysandar týraly aqparat joq. Japonııadaǵy atom nysandarynda da qandaı da bir tótenshe jaǵdaı tirkelmegen.
Kúshti jer silkinisi týraly eskertý jergilikti turǵyndardyń uıaly telefondaryna jiberilip, sondaı-aq Tokıo kóshelerinde keńinen ornatylǵan daýys zoraıtqyshtar arqyly taratyldy. Turǵyndarǵa sabyr saqtap, qajetti saqtyq sharalaryn qabyldaý usynyldy.
Buǵan deıin Japonııanyń Hatıdzedzıma araly jaǵalaýynda magnıtýdasy 5,5 bolatyn jer silkinisi bolǵany habarlanǵan.
Kazinform úshin seriktes TASS agenttigi usynǵan materıal.
