Shymkent mańynda banan fermasy týrıstik orynǵa aınaldy
ASTANA. KAZINFORM — Túrkistan oblysynyń Saıram aýdanynda ornalasqan «Banan baý» fermasynda 5 gektar aýmaqta 7 myńnan astam banan aǵashy ósiriledi. Shymkentten 25 shaqyrym jerde ornalasqan sharýashylyq týrısterge ekskýrsııa usynyp, agrotýrızmdi damytýǵa úles qosyp keledi. Bul týraly Týrızm jáne sport mınıstrligi málim etti.
Vedomstvonyń málimetinshe, Qazaqstanda agrotýrızm týrıstik salanyń perspektıvaly baǵyttarynyń biri retinde damyp keledi. Aýyl sharýashylyǵy men týrızmdi ushtastyratyn bul baǵyt óńirlerdiń ekonomıkalyq áleýetin arttyrýǵa, kásipkerlikti qoldaýǵa jáne týrısterge jańa tájirıbe usynýǵa múmkindik beredi.
Osyndaı jobalardyń biri — «Banan baý» fermasy. Munda 5 gektar aýmaqta 7 myńnan astam banan aǵashy ósiriledi. Nysan aýyl sharýashylyǵy óndirisimen qatar, týrısterge arnalǵan tanymdyq demalys orny retinde de jumys isteıdi.
— Kelýshiler banan ósirý tehnologııasymen, jylyjaı sharýashylyǵynyń erekshelikterimen, ónimdi kútip-baptaý jáne jınaý protsesimen tanysa alady. Fermada ekskýrsııalar uıymdastyrylyp, otbasylyq demalysqa jáne jergilikti ónimderdi satyp alýǵa jaǵdaı jasalǵan, — dep habarlady mınıstrlikten.
Qazaqstanda agrotýrızmdi damytý úshin eleýli áleýet bar. Elimizdiń ár óńirindegi fermerlik sharýashylyqtar, mal ósirý keshenderi, jylyjaılar, omarta jáne ulttyq taǵam óndiretin kásiporyndar týrıstik marshrýttardyń quramyna engizilýi múmkin. Bul aýyldyq aýmaqtarǵa kelýshiler sanyn arttyryp, týrıstik aǵyndy dástúrli demalys oryndarynan ózge baǵyttarǵa bólýge yqpal etedi.
Atalǵan baǵyttyń taǵy bir artyqshylyǵy — jyl boıy týrısterdi qabyldaý múmkindigi. Ásirese jylyjaı sharýashylyqtary maýsymǵa táýeldilikti azaıtyp, turaqty ekskýrsııalyq baǵdarlamalar uıymdastyrýǵa qolaıly.
«Banan baý» fermasy aýyl sharýashylyǵynyń týrıstik ónim qalyptastyrýdaǵy múmkindikterin kórsetedi. Mundaı bastamalar elimizdegi týrıstik usynysty ártaraptandyryp, óńirlerdiń ózindik erekshelikterin tanytýǵa jáne Qazaqstannyń týrıstik tartymdylyǵyn arttyrýǵa yqpal etedi.
Banan fermasy Túrkistan oblysy, Saıram aýdany, Shymkent qalasynan 25 km jerde ornalasqan.
Eske sala keteıik, buǵan deıin Aýyl sharýashylyǵy mınıstrligi Qazaqstanda ósirilgen banan nege dúken sórelerine shyqpaı jatqanyn túsindirgen edi.