Tokıo-2020: Uıymdastyrý komıteti boksshylardyń jarys kestesin resmı bekitti
NUR-SULTAN. QazAqparat – Tokıo Olımpıadasynyń uıymdastyrý komıteti bokstan kelesi jyly ótetin Olımpıada oıyndarynyń kestesin jarııalady, dep habarlaıdy QazAqparat tilshisi.
QR Boks federatsııasy habarlaǵandaı, Tokıo Olımpıadasynyń uıymdastyrý komıteti boks básekesiniń jarys kestesin resmı túrde bekitti.
Olımpıada oıyndarynyń basty dodalarynyń biri boks básekesi 2020 jyldyń 25 shildesi men 9 tamyzy aralyǵynda «Kokýgıkan Arenada» ótpek.
Birinshi jarys kúni sharshy alańda jartylaı orta, jartylaı aýyr jáne aýyr salmaqtaǵy erler, sondaı-aq, jartylaı jeńil salmaqtaǵy áıelder shyǵady.
Al fınaldyq básekeler 4 tamyzda bastalady. Týrnırdiń sońǵy jarys kúni Tokıo oıyndary aıaqtalatyn kúnge tuspa-tus keledi.
Esterińizge sala keteıik, osyǵan deıin Azııa elderi úshin biliktilik týrnıri qańtar aıynda Qytaıda, al ekinshi álemdik týrnır mamyr aıynyń basynda Olımpıada oıyndary ótetin Japonııada ótkiziletini týraly habarlaǵan bolatynbyz.
Qazaqstandyq boksshylar qatysatyn Azııalyq biliktilik týrnırine erler arasynda 41 lıtsenzııa jáne áıelder arasynda 22 lıtsenzııa oınatylady. Erler arasynda olar bylaısha bólinedi: 52 kg-ǵa deıin, 57 kg-ǵa deıin jáne 63 kg-ǵa deıin salmaq sanattarynda alty kvota, 69 kg-ǵa deıin, 75 kg-ǵa deıin jáne 81 kg-ǵa deıin salmaq sanattarynda bes kvota.
Al, áıelder arasynda kontınenttik týrnırde lıtsenzııalar kelesideı bólinetin bolady: 51 kg deıingi salmaq sanatynda alty kvota jáne qalǵan salmaq sanatynda tórt kvota (57 kg deıin, 60 kg deıin, 69 kg deıin, 75 kg deıin).
Álemdik irikteý týrnırine kontınentaldyq jarystarda lıtsenzııa ala almaǵan boksshylar qatysady. Olarǵa erler arasynda Tokıoda ótetin Olımpıadaǵa 31-35 kvota jáne áıelder arasynda 19-21 kvota bólinedi.
