Tokıo-2020 Olımpıadasynda alǵash ret adamnyń bet-júzin taný júıesi qoldanylady

ASTANA. QazAqparat - Tokıo-2020 uıymdastyrý komıteti Olımpıada jáne Paralımpıada oıyndarynda sportshylar men laýazymdy tulǵalardyń, BAQ ókilderi men ózge de qyzmetkerlerdiń bet-júzin taný júıesin qoldanady, dep habarlaıdy QazAqparat tilshisi.

QR UOK baspasóz qyzmeti taratqan málimetke súıensek, mundaı tehnologııalar Olımpıada jáne Paralımpıada oıyndarynda birinshi ret qoldanylmaq. Bul Tokıonyń tarıhta ınnovatsııalyq oıyndardy ótkizgen alǵashqy el bolýǵa tyrysqanyn baıqatady. 

Tokıo-2020 basty seriktesi sanalatyn NEC korporatsııasy bet-álpetti taný júıesin usynady. Akkredıtatsııadan ótken árbir adamnyń fotolary aldyn ala jınalyp, bazada saqtalady. Olar akkredıtatsııa núktelerinde jeke tulǵany taný úshin qajet bolmaq. 

Mundaı júıe Oıyndardyń qaýipsizdigin odan ári arttyra túspek. Ózgeniń akkredıtatsııasyn qoldanyp, sport nysandaryna kirýge múlde bolmaıdy. Tekserý avtomatty túrde júrgiziledi.

«Qaýipsizdikti qamtamasyz etýdegi basty maqsat - belgisiz adamdar men belgisiz zattardy oqıǵa ornyna jibermeý. Mundaı tehnologııa akkredıtatsııadan ótken adamdardy naqtyraq ıdentıfıkatsııalaýǵa kómektesei. Sondaı-aq, ártúrli lokatsııalarǵa múmkindik beredi. Bul qatysýshylardyń qaýipsizdigine kómektesedi dep oılaımyn», - deıdi Qaýipsizdik jónindegi atqarýshy dırektor Tsýesı Ivasıta.