Tokıo-2020: Qazaqstandyq sportshylar qorjynynda 5 joldama bar
Qazaqstan quramasy atalǵan oıyn qarsańynda Olımpıada joldamasyna talasýda. Búginge deıin #TEAMKZ sportshylary bes joldama enshiledi. 2020 jylǵy Olımpıada oıyndaryna álemniń barlyq memleketinen 11 090 sportshy qatysady. Osy oraıda, erler men áıelder teńdigi saqtalǵanyn aıta ketý kerek. Jalpy, qatysýshylardyń 49 paıyzy - áıelder. Olımpıada oıyndarynda 33 sport túrinen 339 medal taratylady. Al mýltısporttyq dodany uıymdastyrýǵa 200 myńnan asa erikti kómektesedi.
Olımpıadalyq sport túrlerinen halyqaralyq federatsııalar oıynǵa qatysatyn atletterdi irikteýden ótkizý júıesin birshama qıyndatty. Negizinen, sportshylardy reıtıng arqyly irikteý júıesi qoldanysqa endi. Atap aıtar bolsaq, jeńil atletıka, aýyr atletıka, karate syndy sport túrlerinde tórtjyldyq dodasyna irikteý kezeńi reıtıng arqyly eseptelýde.
Jyl basynan beri álem sportshylary Olımpıada lıtsenzııasyna talasty bastady. Sporttyń barlyq túrleri boıynsha 2020 jylǵy oıyndarǵa irikteý kezeńi bastalyp ketti. Qazaqstan komandasy sapynan Tokıo oıyndarynyń alǵashqy joldamasyn jeńil atlet Georgıı Sheıko ıelendi. Ol naýryz aıynda ótken Azııa chempıonatynda sporttyq jaıaý júristen kúmis júlde jeńip aldy. Sheıkonyń ýaqyt kórsetkishi – 1 saǵat 20 mınýt 21 sekýnd. Bul - 1 saǵat 21 mınýtqa saı keletin Olımpıada normatıvi úshin jetkilikti kórsetkish.
Sáýir aıynda #TEAMKZ qorjyny taǵy eki lıtsenzııamen tolyqty. Ashyq sýda júzýden Kýveıtte ótken Azııa chempıonatynda Vıtalıı Hýdıakov altyn júldeger atanyp qana qoımaı, Olımpıada joldamasyna ıelik etti. Ol 10 shaqyrymǵa júzýden Tokıo oıyndarynyń lıtsenzııasyna qol jetkizgen.
Birneshe kúnnen soń júzýden Olımpıada chempıony Dmıtrıı Balandınge joldama buıyrdy. Ol Gýandjoýda ótken Champions Swim Series týrnıriniń birinshi kezeńinde 200 metrge brass ádisimen júzýden lıtsenzııa utyp aldy. Al shilde aıynda Dmıtrıı 100 metrge brass ádisimen júzýden taǵy bir joldamany qorjynǵa saldy. Kvandjýda ótip jatqan sý sporty túrlerinen álem chempıonatynyń jartylaı fınalynda Balandın Olımpıada normatıvin oryndaǵan bolatyn.
30 maýsym kúni jeńil atletıkadan ulttyq qurama úzdigi Olga Rypakova Almatyda ótken lıtsenzııalyq Qazaqstan kýboginde joldamaǵa ıelik etti. Rypakova úsh qarǵyp sekirýden 14.37 nátıjesin kórsetip, óziniń tórtinshi Olımpıadasyna joldama aldy.
