Tokıo-2020: Qazaqstan qorjynynda qansha lıtsenzııa bar
NUR-SULTAN. QazAqparat – Qazaqstandyq sportshylar búginge deıin Tokıo Olımpıadasyna sporttyń 15 túrinen 29 joldama jeńip aldy, dep habarlaıdy QazAqparat tilshisi.
Eń kóp lıtsenzııany erkin kúres balýandary jáne sadaq atýshylar jeńip alǵan. Atalǵan sport túrlerinen tórt-tórtten barlyǵy 8 joldama bar.
Ekinshi orynda 3 joldamaǵa ıelik etken jeńil atletter men tasjoldaǵy velosportta synǵa túsetin sportshylar tur.
Al júzý sportynan - 2, grek-rım kúresinen - 2, áıelder kúresinen 2 lıtsenzııa buıyrǵan bolsa, qazirgi bessaıystan taǵy 2 joldamamyz bar.
Kelesi sport túrlerinen ázirge Olımpıadaǵa bir-birden joldama bar - ashyq sýda júzý, sınhrondy júzý, sporttyq quzǵa órmeleý, sporttyq gımnastıka, stend atý, nysana kózdeý, karate.
Eske salaıyq, osy kúnderi Iordanııanyń Amman qalasynda bokstan Azııa-Tynyq muhıty aımaǵy elderiniń irikteý týrnıri ótip jatyr. Bul dodadan keıin joldamalar sany artady degen úmittemiz.
