Tokıo-2020: Bas bapker Nursultan Tursynovtyń oıynyna baǵa berdi
«Olımpıada oıyndary ótip jatyr. Ókinishke oraı, bizdiń sport túri úshin bári aıaqtaldy. Búgin Nursultan Tursynov nemis balýanymen kúreske shyqty. Ol – Olımpıada oıyndarynyń júldegeri. Jekpe-jekte bizdiń sportshymyzdy birinshi qoıdy. Ekinshi úziliste nemis sportshysyn qoıdy. Nursultan aıla-tásil jasady. Biraq, bul ádis baǵalanbady. Men shaǵym túsirdim, ony qarady. Nátıjesinde bul eki upaı bizge berilmedi, áıtse de bul barlyq jaǵynan tolyq kóterilý boldy. Osy eki upaıdy bergende Nursultan jeńiske jeter edi», - dep túsindirdi bas bapker Ortalyq kommýnıkatsııalar qyzmetindegi onlaın brıfıngide.
Óz kezeginde QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Sápıev qazaqstandyqtardan sportshylardy barynsha qoldaýdy surady. Óıtkeni Olımpıda áli aıaqtalǵan joq.
«Qandaı da bir sport túri boıynsha maman bolyp, qorytyndy shyǵarýdyń qajeti joq. Barlyq qazaqstandyqtardan áli shyǵatyn sportshylarǵa barynsha qoldaý kórsetýdi suraımyn. Jeńilgen kezde qalaı qıyn bolaryn óz tájirıbemnen bilemin. Barlyǵynan sportshylardy qoldaýdy suraımyn. Biz áli de kúresetin bolamyz», - dedi Serik Sápıev.
Eske sala ketsek, búgin 87 keli salmaq dárejesindegi qazaqstandyq balýan Nursultan Tursynov kilemge shyqty. Onyń alǵashqy qarsylasy germanııalyq Denıs Kýdla boldy. Ekeýara kezdesý 4:1 esebimen nemis sportshysynyń enshisine sheshildi.
