Toqaevtyń saılaýaldy shtabynda Prezıdenttik jastar kadrlyq rezervi múshelerimen kezdesý ótti

ASTANA. QazAqparat – QR prezıdenttigine kandıdat Qasym-Jomart Toqaevtyń saılaýaldy shtabynda Prezıdenttik jastar kadrlyq rezervi (PJKR) músheleriniń qatysýymen kezdesý ótti, dep habarlaıdy QazAqparat kandıdattyń respýblıkalyq qoǵamdyq shtabyna silteme jasaı otyryp.

Memleket basshysy Prezıdenttik jastar kadrlyq rezervin qurý ıdeıasyn óziniń 2019 jylǵy saılaýaldy baǵdarlamasynda jarııalaǵany belgili. Rezerv jastar úshin áleýmettik lıft retinde quryldy. Sol jyly alǵashqy irikteý ótkizilip, 300 jas tańdaldy. 2021 jyly rezerv taǵy 50 qatysýshymen tolyqty.

Kezdesýde «AMANAT» partııasynyń Atqarýshy hatshysy Ashat Oralov Qasym-Jomart Toqaevtyń saılaýaldy baǵdarlamasy týraly aıtyp berdi.

Rezerv músheleriniń arasynda qazir Germanııa, Sıngapýr sııaqty basqa da shetelde júrgen jastar bar. Olar kezdesýge onlaın qatysyp, ózderi júrgen elderdegi arnaıy saılaý ýchaskelerine baryp, daýys berýge nıetti ekenderin jetkizdi.

Esterińizge sala keteıik, saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al, 20 qarashada prezıdent saılaýy ótedi.