Toqaevtyń respýblıkalyq qoǵamdyq shtaby SQO sharýalarymen kezdesti

PETROPAVL. QazAqparat – Prezıdenttikke kandıdat Qasym-Jomart Toqaevtyń Respýblıkalyq qoǵamdyq shtabynyń músheleri Soltústik Qazaqstan oblysynyń turǵyndarymen birqatar kezdesý ótkizdi, dep habarlaıdy QazAqparat qoǵamdyq shtabqa silteme jasaı otyryp.

Shtab músheleri «Peterfeld Agro» óndiris bazasynda soltústikqazaqstandyq sharýalarmen jáne aýylsharýashylyq taýarlaryn óndirýshilermen kezdesti. Іs-shara barysynda kandıdattyń saılaý aldyndaǵy baǵdarlamasynda kórsetilgen aldaǵy jeti jylda aýyl sharýashylyǵyn damytýǵa arnalǵan sharalar talqylandy.

Sondaı-aq RQSh músheleri Beskól aýylynda jurtshylyqpen kezdesip, óńirlerdiń ınfraqurylymyn damytý jónindegi saılaý aldyndaǵy bastamalardy talqylady. Toqaevtyń jaqtastary Petropavl qalasyndaǵy Kozybayev University ýnıversıtetinde jastarmen, S.Muqanov atyndaǵy oblystyq ámbebap ǵylymı kitaphanada jergilikti sarapshylarmen kezdesti. Odan bólek, qaǵaz ónimderin óndiretin «Raduga KDR» kompanııasynyń jáne «Alageum Electric» elektrotehnıkalyq zaýytynyń ujymdarymen kezdesýler ótti.

Esterińizge sala keteıik, saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al 20 qarashada prezıdent saılaýy ótedi.