Toqaevtyń Germanııaǵa sapary eki eldiń seriktestigin nyǵaıtady
BERLIN. QazAqparat – Qazaqstan Prezıdenti Qasym-Jomart Toqaevtyń resmı sapary Germanııa Federatıvtik Respýblıkasymen seriktestikti nyǵaıtady.
Mundaı pikirdi Ortalyq Azııa jónindegi nemis sarapshysy ári jýrnalıst Ýrs Ýnkaýf bildirdi, dep habarlaıdy QazAqparat tilshisi.
«Qazaqstan Germanııa men Eýropanyń Ortalyq Azııadaǵy iri ekonomıkalyq seriktesi sanalady. Qazaqstandyq taraptyń ekonomıkalyq dıplomatııaǵa beıildigi osynaý dınamıkany únemi tolyqtyra túsýge sep bolyp otyr», - deıdi «QazAqparatqa» elektrondy poshta arqyly hat joldaǵan nemis jýrnalısi.
Onyń dereginshe, 2005 jyldan bastap bıylǵy jyldyń 2-toqsanyna deıingi aralyqta Germanııanyń Qazaqstanǵa salǵan tikeleı ınvestıtsııasynyń jalpy kólemi 5,2 mlrd dollarǵa jetip otyr.
«Qazan aıynyń basynda Berlınde ótken german-qazaq ekonomıkalyq forýmynda QR Premer-Mınıstri Roman Sklıar bastaǵan qazaqstandyq delegatsııa shamamen 700 mln dollardy quraıtyn ınvestıtsııalyq jobalarǵa taǵy da bastama jasaı aldy. Saıası kózqaras turǵysynda Qazaqstan Germanııa men Eýropalyq Odaq úshin óńirde mańyzdy rólge ıe. Áleýmettik turaqtylyq tán Qazaqstan Eýrazııadaǵy qaýipsizdiktiń jáne janjaldardy beıbit retteýdiń ornyn eshkim basa almaıtyn qozǵaýshysy sanalady», - dep atap ótedi sarapshy.
Ýrs Ýnkaýftyń paıymynsha, Qazaqstannyń jan-jaqty beıbit bastamalary, máselen ıadrolyq qarýsyzdandyrý úshin kúresi nemese Eýrazııa men Eýropa arasyndaǵy dıalogqa septesýi joǵary halyqaralyq qurmetke ıe boldy. Sondyqtan da sarapshy Ortalyq Azııadaǵy german syrtqy saıasatynyń maqsaty men Qazaqstannyń múdesi kóp jaǵdaıda saı kelip otyrady.
Qasym-Jomart Toqaevtyń Prezıdent retinde EO memleketterine alǵashqy resmı saparyn Germanııadan bastaýyna qatysty pikir bildirgen ol mundaı qadamdy resmı Nur-Sultannyń Berlındi Eýropadaǵy negizgi seriktes retinde qarastyrýymen túsindiredi.
«Joǵaryda atalǵan qarqyndy ekonomıkalyq qatynastar ǵana emes, sonymen birge kóptegen mádenı jáne jeke baılanystar ekijaqty tamasha qarym-qatynas úshin aıtarlyqtaı faktor sanalady», - dedi ol.
Onyń paıymynsha, Berlındegi Nemis-qazaq qoǵamdastyǵy, Almatydaǵy Qazaqstan-nemis ýnıversıtetiniń qyzmeti elder arasyndaǵy qarym-qatynasty nyqtaı túsedi.
«Prezıdenttiń Berlınge sapary Qazaqstannyń Ortalyq Azııadaǵy Germanııanyń mańyzdy seriktestigi retindegi rólin nyǵaıta túsýge septigin tıgizedi», - dedi Ýrs Ýnkaýf.
Buǵan deıin 5-6 jeltoqsanda Qazaqstan Prezıdenti Qasym-Jomart Toqaev Germanııa Federatıvtik Respýblıkasyna resmı saparmen baratyndyǵyn habarlaǵan edik.
Tımýr Dúısekeev
