Toqaevtyń Joldaýy Qazaqstan men Ázerbaıjan yntymaqtastyǵyna jańa múmkindikter ashady — Baký sarapshysy
BAKÝ. KAZINFORM – Qazaqstan Prezıdenti Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Joldaýy eldiń ekonomıkany jańǵyrtý baǵytyndaǵy basymdyqtaryn aıqyndap, Ázerbaıjanmen yntymaqtastyqty, ásirese kólik, logıstıka jáne ınvestıtsııa salalaryndaǵy baılanysty keńeıtýge qosymsha múmkindikter ashady. Bul týraly Bakýde Kazinform agenttiginiń menshikti tilshisine bergen suhbatynda Halyqaralyq qatynastar jáne mýltıkýltýralızmdi taldaý ortalyǵynyń aǵa keńesshisi Roza Baıramly málimdedi. Ol Joldaýdyń ekijaqty qarym-qatynas úshin mańyzyna toqtaldy.
Sarapshynyń aıtýynsha, Qazaqstannyń Eýrazııadaǵy negizgi kólik-logıstıka ortalyqtarynyń biri retindegi ornyn nyǵaıtýǵa umtylysy erekshe mańyzǵa ıe. Bul Ortalyq Azııa men Eýropa naryqtary arasyndaǵy baılanysty qamtamasyz etýde mańyzdy ról atqaratyn Ázerbaıjannyń da múddesine saı keledi.
– Qazaqstan men Ázerbaıjan Orta dálizdiń Azııa men Eýropany baılanystyratyn neǵurlym jyldam, senimdi ári básekege qabiletti baǵytqa aınalýyna múddeli. Ol úshin ınfraqurylymdy damytýmen qatar, tarıfterdi úılestirý, kedendik rásimderdi jeńildetý jáne júkterdi jetkizý merzimin qysqartý mańyzdy, – dedi sarapshy.
Ol Qazaqstannyń «Aral – Kaspıı» temirjol magıstralin salý josparyna da nazar aýdardy. Aıtylǵan baǵalaýlarǵa sáıkes, bul joba Transkaspıı halyqaralyq kólik baǵytynyń uzyndyǵyn shamamen 1 myń shaqyrymǵa qysqartýǵa múmkindik beredi.
– Bul jobanyń iske asyrylýy Orta dálizdiń tartymdylyǵyn arttyrýy múmkin. Degenmen, onyń nátıjesi temirjoldardyń, porttardyń jáne teńiz tasymaldaýshylarynyń, sonyń ishinde Kaspıı teńizindegi tasymal qyzmetteriniń úılesimdi jumysyna baılanysty bolady, – dep túsindirdi Roza Baıramly.
Onyń pikirinshe, Qazaqstan men Ázerbaıjan arasyndaǵy yntymaqtastyqtyń áleýeti kólik salasymen ǵana shektelmeıdi. Joldaýda ınvestıtsııa tartýǵa, ónerkásip óndirisine jáne tsıfrlandyrýǵa basymdyq berilýi birlesken jobalardy júzege asyrýǵa jáne ekonomıkalyq baılanystardy keńeıtýge múmkindik beredi.
– Negizinen tranzıtke baǵyttalǵan ózara is-qımyldan keń aýqymdy ekonomıkalyq yntymaqtastyqqa kóshý mańyzdy. Birlesken ınvestıtsııalyq jobalar men logıstıkadaǵy tsıfrlyq sheshimder eki elge de qosymsha ekonomıkalyq paıda ákelýi múmkin, – dep atap ótti sarapshy.
Sondaı-aq ol Ázerbaıjannyń Ortalyq Azııa elderimen baılanysyn keńeıtýi birlesken saýda, ınvestıtsııa jáne ınfraqurylymdyq bastamalardy ilgeriletýge qosymsha jaǵdaı qalyptastyratynyn aıtty.
– Qazaqstan men Ázerbaıjan Ortalyq Azııa men Ońtústik Kavkaz arasyndaǵy ekonomıkalyq baılanystardy nyǵaıtýǵa múddeli. Basty mindet – qolda bar múmkindikterdi saýda kóleminiń ósýine jáne kólik baǵyttarynyń tıimdiligin arttyrýǵa yqpal etetin naqty jobalarǵa aınaldyrý, – dep túıindedi Roza Baıramly.
Eske salaıyq, buǵan deıin Qazaqstan strategııalyq zertteýler ınstıtýtynyń (QSZI) sarapshysy Qazaqstan ekonomıkasynyń ósimnen damý sapasyn arttyrý kezeńine ótýi qajettigin málimdegen edi.
