Toqaevtyń Japonııaǵa sapary, EADB boljamy, mýzykalyq jetistikter: Álemdik BAQ Qazaqstan týraly ne jazdy

ASTANA.KAZINFORM — Osy aptada sheteldik buqaralyq aqparat quraldary Qazaqstan týraly birneshe ret jazdy. Kazinform agenttigi elimiz týraly álemdik baspasózge sholý jasap kórdi. 

Kyodo News:  Japonııa men Qazaqstan sammıtinde resýrstar men energetıka salasyndaǵy yntymaqtastyqty nyǵaıtý týraly kelisim bekitildi.

18 jeltoqsanda Tokıoda Japonııa premer-mınıstri Sanae Takaıchı Qazaqstan Prezıdenti Qasym-Jomart Toqaevpen kelissóz júrgizdi. Kezdesý qorytyndysy boıynsha taraptar munaı men tabıǵı gazdy qosa alǵanda, Qazaqstannyń energetıkalyq jáne mıneraldyq resýrstary salasyndaǵy yntymaqtastyqty kúsheıtýge ýaǵdalasty, dep habarlaıdy japondyq Kyodo News agenttigi.

Kelissózderdiń basty nátıjesi — strategııalyq áriptestikti tereńdetý týraly birlesken málimdemege qol qoıylýy boldy. Japon tarapy resýrstardy turaqty ári ártaraptandyrylǵan túrde jetkizýge múddeli ekenin, sondaı-aq Ortalyq Azııa men Eýropany jalǵaıtyn kólik-logıstıkalyq baǵyttardy damytýǵa nıetti ekenin rastady. Osy oraıda Tokıo tranzıttiń tıimdiligin arttyrý maqsatynda porttardaǵy keden qyzmetterin iri kólemdi rentgendik tekserý jabdyqtarymen qamtamasyz etýge daıyn ekenin málimdedi, dep jazady basylym.

— Saıası turǵydan alǵanda, Takaıchı Qazaqstandy erkin ári ashyq halyqaralyq tártip qaǵıdattaryn qoldaıtyn strategııalyq áriptes retinde atap ótip, Japonııanyń uzaq merzimdi yntymaqtastyqqa daıyn ekenin bildirdi. Óz kezeginde Toqaev Japonııany Qazaqstannyń senimdi ári ýaqyt synynan ótken dosy dep sıpattady, — delingen maqalada.

The Japan Times: Imperator Qazaqstan Prezıdentin Imperatorlyq saraıda qabyldady
Japonııa ımperatory Narýhıto beısenbi kúni Tokıodaǵy Imperatorlyq saraıda Qazaqstan Prezıdenti Qasym-Jomart Toqaevty qabyldady, dep habarlaıdy The Japan Times.

Kezdesýdiń basty taqyryby sý resýrstary máselesi boldy. Bul baǵytqa Narýhıto óziniń ǵylymı jáne qoǵamdyq qyzmetinde aıryqsha kóńil bólgeni aıtylady. Imperator byltyr Qazaqstanda bolǵan sý tasqyny saldarynan kelgen shyǵynǵa kóńil aıtyp, Kaspıı teńizi deńgeıiniń tómendeýi men soǵan baılanysty sý tapshylyǵyna alańdaýshylyq bildirdi.

Al Qasym-Jomart Toqaev Qazaqstannyń sý problemalaryn sheshýge arnalǵan keshendi halyqaralyq tásildi ázirleý jóninde Birikken Ulttar Uıymyna bastama usynatynyn jetkizdi.

Imperator Narýhıto bul ustanymdy qoldap, kóptegen elder men sarapshylardyń birlesken jumysy arqyly ǵana qol jetkizýge bolatynyn basa aıtty. 

Kezdesý Qazaqstan men Japonııa arasyndaǵy dıalogtyń ekologııalyq ólshemin aıqyndap, Qazaqstannyń transshekaralyq sý resýrstary men Kaspıı máselesine halyqaralyq deńgeıde artyp kele jatqan nazaryn kórsetti, dep jazady The Japan Times.

TASS: Qazaqstan Novorossııskidegi KQK-ǵa shabýyldan keıin aılaq qurylǵylaryn satyp alýdy jedeldetti

Qazaqstan Novorossıısk qalasyndaǵy teńiz termınalyna jasalǵan shabýyldan keıin Kaspıı qubyr konsortsıýmynyń jumysyn qalpyna keltirý úshin eki jańa syrtqy aılaq qurylǵysyn satyp alý men jetkizý merzimin jedeldetti. Qazaqstannyń Energetıka mınıstri Erlan Aqkenjenovtiń aıtýynsha, Birikken Arab Ámirlikterinde óndirilgen bul jabdyq bastapqyda sáýir aıynda jetkizilýi tıis bolǵan, alaıda merzim qańtarǵa aýystyryldy, dep habarlaıdy TASS.

Mınıstrdiń sózinshe, logıstıkany jedeldetý úshin mınıstrlik pen ulttyq munaı-gaz kompanııasy barlyq múmkindikti shuǵyl túrde iske qosqan. Bul sheshim 29 qarashada jasalǵan shabýyldan keıin qabyldandy, sonyń saldarynan Qazaqstan shamamen 480 myń tonna munaıdy jetkize almaı qalǵan. QR Energetıka mınıstrligi bul oqıǵany jol berýge bolmaıtyn jaǵdaı ári jahandyq energetıkalyq qaýipsizdikke qater tóndiretin oqıǵa dep baǵalady, dep jazady agenttik.

Trend: EADB 2026 jyldyń sońyna qaraı Qazaqstanda bazalyq mólsherleme tómendeıtinin boljaıdy

Eýrazııalyq damý banki Qazaqstan Ulttyq bankiniń bazalyq mólsherlemesi 2026 jyldyń sońyna qaraı shamamen 14% deńgeıine deıin tómendeıtinin boljap otyr. Bul týraly EADB taldamalyq jumys jónindegi dırektsııasynyń jetekshisi Alekseı Kýznetsov Almatyda ótken makroekonomıkalyq boljamnyń tanystyrylymynda málimdedi, dep jazady Trend.

Banktiń baǵalaýynsha, ınflıatsııa 2026 jyldyń naýryz-sáýir aılarynda shegine jetkennen keıin baıaýlap, sol jyldyń sońyna qaraı jyldyq eseppen 9,7% deńgeıine deıin tómendeıdi. Qosylǵan qun salyǵynyń 12%-dan 16%-ǵa deıin ósýi I toqsanda ınflıatsııalyq qysymdy kúsheıtedi, alaıda baǵanyń ósýi aqsha-nesıe saıasaty sharalary, turǵyn úı-kommýnaldyq sharýashylyq tarıfteriniń ósýin ýaqytsha toqtatý jáne baǵany ishinara retteý esebinen tejeledi.

EADB boljamynsha, bazalyq mólsherleme 2026 jyldyń II toqsanyna deıin 18% deńgeıinde saqtalyp, odan keıin retteýshi ony kezeń-kezeńimen tómendete bastaıdy, dep jazady basylym.

Sınhýa: Qytaı men Qazaqstannyń ekonomıkalyq aımaqtary birlesken ınvestıtsııalyq platforma qurý jóninde yntymaqtastyq týraly kelisimge qol qoıdy

Úrimji qalasyndaǵy «Gantsıýanpý» tehnıkalyq-ekonomıkalyq damý aımaǵy men Qazaqstandaǵy «Aqtóbe» arnaıy ekonomıkalyq aımaǵy yntymaqtastyq jónindegi negizgi kelisimge qol qoıdy. Qujat halyqaralyq ózara is-qımyl parkin jáne biryńǵaı ınvestıtsııalyq platformany birlesip qurýdy kózdeıdi, dep habarlady Sınhýa agenttigi.

Bul kelisim Qytaı men Qazaqstan arasyndaǵy óńiraralyq yntymaqtastyqty naqty iske asyrý deńgeıine kóshirýge, sondaı-aq saýda men ınvestıtsııaǵa arnalǵan jańa ınfraqurylym qalyptastyrýǵa baǵyttalǵan. «Gantsıýanpý» aımaǵy bul kelisim ónerkásiptik kooperatsııany nyǵaıtyp, resýrstardy birlesip paıdalanýǵa jáne ekonomıkalardyń ózara ashyqtyǵyn arttyrýǵa yqpal etetinin aıtyp otyr. 

Taraptar shekaraaralyq yntymaqtastyqty birqatar negizgi baǵyt boıynsha damytýǵa kelisti.

Olardyń qatarynda ónerkásiptik damýdy úılestirý, saýda-ekonomıkalyq baılanystardy keńeıtý, ınnovatsııalyq ózara is-qımyl platformasyn qurý jáne basqarý tájirıbesimen almasý bar. «Gantsıýanpý» aımaǵy ákimshilik komıteti tóraǵasynyń orynbasary Dın Hýeıdiń aıtýynsha, bul joba dástúrli áriptestiktiń jalǵasy ǵana emes, Qazaqstan-Qytaı yntymaqtastyǵyn jańa formattarda keńeıtip, oǵan qosymsha serpin beredi.

QNA: Dohada kórnekti halyqaralyq tulǵalardyń qatysýymen birinshi halyqaralyq mýzyka jáne marshtar festıvali ashyldy

Qazaqstannyń áskerı mýzykanttary Dohadaǵy alǵashqy Doha Tattoo — halyqaralyq áskerı mýzyka jáne marshtar festıvalinde óner kórsetti, dep habarlaıdy QNA Qatar agenttigi.

QR Qorǵanys mınıstrliginiń qurmetti qaraýly jáne Qarýly Kúshterdiń Ortalyq áskerı orkestri dástúrli jáne zamanaýı mýzykalyq elementterdi biriktirgen baǵdarlamany usyndy.
Festıval Qatar Іshki ister mınıstriniń qoldaýymen ótip jatyr jáne Qatar, Oman, Iordanııa, Ulybrıtanııa, AQSh, Túrkııa jáne Qazaqstan áskerı orkestrlerin biriktirdi. Doha Tattoo halyqaralyq mádenı almasýdyń jańa platformasy retinde tanystyrylady, munda áskerı mýzyka elder arasyndaǵy ózara árekettestiktiń ámbebap tili retinde paıdalanylady, dep jazady QNA.

Buǵan deıin zańdaǵy reformalar, munaı óndirisi jáne Golovkınniń jetistigi týraly sheteldik basylymda jarııalanǵan maqalalarǵa sholý usynǵan edik.