Toqaevtyń tóraǵalyǵymen UQShU Ujymdyq qaýipsizdik keńesiniń kezekti sessııasy ótip jatyr
ASTANA. KAZINFORM – Elordada Memleket basshysy Qasym-Jomart Toqaevtyń tóraǵalyǵymen UQShU Ujymdyq qaýipsizdik keńesiniń kezekti sessııasy shaǵyn quramda ótip jatyr.
«UQShU-ǵa qatysýshy memleketter basshylaryna búgingi otyrys jumysyna qatysqany úshin shyn júrekten alǵysymdy bildirgim keledi. Ujymdyq qaýipsizdik sharty uıymy Eýrazııanyń ulanǵaıyr keńistiginde beıbitshilik pen turaqtylyqty qamtamasyz etýdegi negizgi qurylymǵa aınaldy. Qazirgi zamanǵy syn-qaterler jaǵdaıynda UQShU barlyq qatysýshy el úshin qaýipsizdiktiń kepili retinde óziniń suranysta ekenin únemi kórsetip keledi. Bizdiń kelisilgen is-áreketterimiz, ózara senimimiz jáne qoldaýymyz eń kúrdeli jáne aýqymdy mindetterdi sheshýdiń ujymdyq qabiletin nyǵaıtady. UQShU – bul jaı ǵana áskerı seriktestik emes, bizdiń memleketterimizdiń egemendigi men aýmaqtyq tutastyǵyn qorǵaý úshin kúsh-jigerimiz ben resýrstarymyzdy biriktiretin biregeı mehanızm ekenin atap ótý mańyzdy», - dedi otyrysty ashqan Qasym-Jomart Toqaev.
Prezıdent Qazaqstan UQShU tóraǵasy retinde óz kúsh-jigerin qatysýshy elderdiń tyǵyz ózara is-qımylyn nyǵaıtýǵa, daǵdarysty jaǵdaılarǵa jedel den qoıý tetikteriniń tıimdiligin arttyrýǵa, sondaı-aq terrorızmdi, kıbershabýyldardy, transulttyq qylmysty jáne esirtkiniń zańsyz aınalymyn qosa alǵanda, qazirgi zamanǵy qaýip-qaterlermen kúreste uıymnyń múmkindikterin damytýǵa jumyldyrǵanyn basa aıtty.
«Josparly tártippen UQShU-nyń jarǵylyq organdarynyń otyrystary, áskerı oqý-jattyǵýlary jáne profılaktıkalyq operatsııalary ótkizildi. Ujymdyq qaýipsizdiktiń ózekti máselelerin Syrtqy ister jáne Qorǵanys mınıstrleri jan-jaqty pysyqtady. Qaýipsizdik keńesteriniń hatshylary men Parlament basshylary deńgeıinde kezdesýler ótti. Uıymnyń kómekshi jáne jumys organdarynyń keńesteri ótkizildi. UQShU qyzmetiniń túrli baǵyty boıynsha birqatar konsýltatsııa ótti. Sessııaaralyq kezeńde birqatar mańyzdy qujat qabyldandy. Olar halyqaralyq yntymaqtastyq, qorǵanys salasyndaǵy ózara is-qımyl, sondaı-aq ujymdyq qaýipsizdiktiń ózekti syn-qaterleri men qaýipterine qarsy is-qımyl máselelerin qamtıdy», - dedi Memleket basshysy.
Osyǵan deıin Astanada UQShU jarǵylyq organdarynyń birlesken otyrysy ótkenin habarladyq.