Toqaevtyń Reseıge sapary mazmundy ótti — Pýtınniń baspasóz hatshysy

MÁSKEÝ. KAZINFORM — Reseı prezıdentiniń baspasóz hatshysy Dmıtrıı Peskov Qazaqstan Prezıdenti Qasym-Jomart Toqaevtyń Reseıge memlekettik sapary mazmundy ótkenin málimdedi, dep habarlaıdy Kazinform Adıl Baltabaevtyń Telegram-arnasyna silteme jasap.

— Kelissózderge eki taraptan shamamen 50 delegat qatysty. Reseılik jýrnalıster mundaı jaǵdaıdyń sońǵy ret qashan bolǵany esinde joq ekenin atap ótti, — delingen habarlamada.

Dmıtrıı Peskov Toqaevtyń Reseıge sapary áserli ótkenin, onyń bastysy syrtqy kórinisten emes, mazmundyq máninen kóringenin atap ótti.

Sonymen qatar, Peskov eki el arasyndaǵy kún tártibindegi máseleler kóp bolǵandyqtan, eki taraptyń barlyq mınıstrleri qatysýy kerek ekenin aıtty.

Aıta keteıik, búgin Kremlde Qasym-Jomart Toqaevty resmı qarsy alý rásimi ótti.

Qarsy alý rásiminen keıin Qasym-Jomart Toqaev pen Vladımır Pýtın kelissóz ótkizdi.

Kelissóz barysynda Reseı Federatsııasynyń prezıdenti Vladımır Pýtın Qazaqstan men Reseı — jaqyn seriktes, dostas ári odaqtas elder ekenin aıtty.

Keıinnen eki el basshysy keńeıtilgen quramda kelissóz júrgizdi.

Budan bólek Memleketter basshylary Oral qalasynda ótip jatqan XXI Qazaqstan – Reseı óńiraralyq forýmynyń plenarlyq sessııasyna beınebaılanys arqyly qatysty.

Shara kezinde Qazaqstan Prezıdenti Qasym-Jomart Toqaev atom elektr stansasy qurylysyna qatysty máselelerge toqtaldy.

Qasym-Jomart Toqaev pen Vladımır Pýtın kelissózder qorytyndysy boıynsha Qazaqstan Respýblıkasy men Reseı Federatsııasynyń memleketaralyq qarym-qatynasyn jan-jaqty strategııalyq seriktestik jáne odaqtastyq deńgeıine deıin jetkizý jónindegi deklaratsııaǵa qol qoıdy.

Sondaı-aq, Qazaqstan-Reseı tarapy qosymsha 13 kelisim qabyldandy.