Toqaevtyń Germanııaǵa sapary: sheteldik BAQ qandaı kelisimderge nazar aýdardy

Deutsche Welle: Qazaqstan – Germanııanyń Ortalyq Azııadaǵy negizgi seriktesi

Nemistiń Deutsche Welle basylymy Qasym-Jomart Toqaevtyń Germanııaǵa saparyna oraı eki eldiń ekonomıkalyq baılanystaryna arnalǵan materıal jarııalady. Basylym Qazaqstannyń Germanııanyń Ortalyq Azııadaǵy negizgi ekonomıkalyq seriktesi ekenin atap, óńir elderimen aradaǵy jalpy taýar aınalymynyń shamamen 80%-y Qazaqstanǵa tıesili ekenin jazdy.

Osy rette DW shıkizat pen energetıka salasyndaǵy yntymaqtastyqqa nazar aýdarǵan. Basylymnyń málimetinshe, 2026 jyldyń ekinshi toqsanynda Qazaqstan Eýropalyq odaq ımporttaıtyn munaıdyń shamamen 13,4%-yn, kómirdiń 9%-dan astamyn qamtamasyz etken. Al ótken jyly Germanııaǵa 10,3 mln tonna munaı jetkizilgen.

Alaıda eki eldiń ekonomıkalyq baılanysy munaı men basqa da shıkizat resýrstarymen shektelmeıdi. DW Qazaqstan men Germanııanyń saýda-sattyqty ártaraptandyrýǵa, ınvestıtsııa tartýǵa jáne óndiristi jergiliktendirýge umtylyp otyrǵanyn atap ótedi. Birlesken deklaratsııada metallýrgııa, munaı-hımııa, tamaq ónerkásibi jáne temirjol mashına jasaý perspektıvaly baǵyttar retinde kórsetilgen.

Bul maqsattar 2026-2028 jyldarǵa arnalǵan Jol kartasynda da kórinis tapqan. Qujat birlesken óndirister ashý, strategııalyq mańyzy bar materıaldardy óndirý jáne óńdeý, Qazaqstanda qosylǵan quny joǵary ónim shyǵarýdy arttyrý jáne turaqty jetkizý tizbekterin qalyptastyrýdy kózdeıdi.

Ekonomıkalyq baılanystardyń taǵy bir mańyzdy bóligi – kólik-logıstıka. Osy turǵyda DW Qytaı men Eýropany Qazaqstan, Ońtústik Kavkaz jáne Túrkııa arqyly baılanystyratyn Transkaspıı halyqaralyq kólik baǵytynyń mańyzyn atap ótken. Qazaqstan Prezıdentiniń Handelsblatt basylymyndaǵy maqalasyna súıengen DW dereginshe, bıylǵy alǵashqy segiz aıda bul baǵyttaǵy júk tasymaly 22%-ǵa ósken.

Basylym ekonomıkalyq yntymaqtastyqtyń saıası jáne geografııalyq faktorlarmen baılanysyna da toqtalǵan. Atap aıtqanda, Qazaqstan munaıynyń Germanııaǵa jetkizilýi Reseı aýmaǵyndaǵy tranzıttik ınfraqurylymǵa ishinara táýeldi ekeni aıtylǵan. Osy kontekste DW Qasym-Jomart Toqaevtyń Reseı-Ýkraına qaqtyǵysyna qatysty pikirlerin keltiredi.

Materıaldyń bul bóligi Qazaqstan men Germanııanyń halyqaralyq quqyqqa qatysty ortaq ustanymdaryna ulasady. DW eki el prezıdentteriniń Birlesken deklaratsııada memleketterdiń egemendigi, táýelsizdigi men aýmaqtyq tutastyǵyn qurmetteý qaǵıdatyna beıildiligin rastaǵanyn jazady. Sondaı-aq taraptar BUU Jarǵysyna sáıkes Ýkraınada beıbitshilik ornatýdy qoldaıtynyn málimdegen.

Der Spiegel: Qazaqstan Germanııaǵa munaı jetkizilimin arttyrmaq

Nemistiń Der Spiegel basylymy Qasym-Jomart Toqaevtyń Germanııaǵa sapary aıasynda Qazaqstan munaıynyń Germanııa naryǵyndaǵy mańyzyna nazar aýdardy.

Germanııa kantsleri Frıdrıh Mertspen birlesken baspasóz máslıhatynda Qasym-Jomart Toqaev Qazaqstan munaı jetkizilimin arttyrýǵa nıetti ekenin málimdedi. Al Frıdrıh Merts Germanııanyń Qazaqstan munaıyna qyzyǵýshylyq tanytyp otyrǵanyn aıtyp, Berlın úshin jetkizý kózderin ártaraptandyrý mańyzdy. Degenmen taraptar munaı kólemin naqty qansha kólemde ulǵaıtatynyn jarııalaǵan joq.

Bul rette basylym Qazaqstan munaıynyń Shvedt qalasyndaǵy PCK munaı óńdeý zaýyty úshin mańyzyna toqtalady. Reseı munaıyn jetkizý toqtaǵannan keıin qazaqstandyq munaı zaýyttyń negizgi shıkizat kózderiniń birine aınalǵan. Kóktemge deıin munda óńdelgen munaıdyń shamamen besten biri Qazaqstannan jetkizilgen.

Alaıda qazaqstandyq munaıdy Germanııaǵa jetkizý baǵytynda qıyndyq kezdesken. Mamyr aıynda Reseı «Drýjba» munaı qubyry arqyly Qazaqstan munaıynyń Brandenbýrgke tranzıtin toqtatqan. Osydan keıin PCK zaýyty balama jetkizý joldaryn, sonyń ishinde Polsha arqyly tasymaldaý múmkindigin qarastyra bastaǵan.

Munaı máselesimen qatar, Der Spiegel Qazaqstannyń halyqaralyq ustanymyna da nazar aýdarǵan. Basylym Qasym-Jomart Toqaevtyń barlyq memleketterdiń aýmaqtyq tutastyǵyn qurmetteý qajettigi týraly málimdemesin, sondaı-aq Qazaqstannyń Reseı jáne Ýkraınamen qarym-qatynasyna qatysty pikirlerin keltiredi.

Euronews: Qazaqstan men Germanııa shıkizat pen jańa tehnologııalar baǵytynda yntymaqtastyqty kúsheıtpek

Euronews Qasym-Jomart Toqaevtyń Berlınge sapary barysynda shıkizat salasyndaǵy yntymaqtastyq negizgi taqyryptardyń biri bolǵanyn jazdy. Germanııa jetkizýshiler aıasyn keńeıtýge umtylsa, Qazaqstan shıkizat eksporttaýshy el retindegi rólin ónerkásiptik seriktestikpen tolyqtyrýǵa múddeli.

Qyzyǵýshylyq eki el arasyndaǵy saýda baılanystarynan da kórinedi. Basylymnyń atap ótýinshe, Qazaqstan Germanııanyń Ortalyq Azııadaǵy negizgi ekonomıkalyq seriktesi sanalady. Germanııanyń óńir elderimen jalpy saýdasynyń shamamen 80%-y Qazaqstanǵa tıesili.

Osy rette strategııalyq mańyzy bar shıkizat yntymaqtastyqtyń basym baǵyttarynyń birine aınalyp otyr. Qazaqstan Eýropalyq odaq strategııalyq mańyzdy dep belgilegen 34 túrli shıkizattyń 21 túrin óndiredi. Astana Germanııaǵa olardy tek óndirý jáne jetkizýdi emes, Qazaqstanda óńdep, daıyn ónim shyǵarýdy qamtıtyn birlesken óndiris tizbekterin qurýdy usynyp otyr.

Ekonomıkalyq seriktestiktiń taǵy bir baǵyty – kólik jáne logıstıka. Euronews Qazaqstannyń geografııalyq ornalasýy ony Eýropa men Azııa arasyndaǵy mańyzdy baılanystyrýshy býynǵa aınaldyratynyn atap ótedi. Ásirese, Kaspıı teńizi arqyly ótetin balama saýda baǵyttarynyń áleýeti joǵary.

Osy baǵyttardy júıeli túrde damytý úshin Qazaqstan men Germanııa 2026-2028 jyldarǵa arnalǵan ekonomıkalyq yntymaqtastyq jónindegi Jol kartasyn qabyldaýǵa kelisti. Qujat strategııalyq mańyzy bar shıkizat, ónerkásiptik jáne tehnologııalyq kooperatsııa jáne turaqty jetkizý tizbekterin damytý máselelerin qamtıdy.

Yntymaqtastyqtyń jańa kezeńinde dástúrli ekonomıkalyq baǵyttarmen qatar energetıka, tsıfrlandyrý, jasandy ıntellekt, kólik jáne logıstıka salalaryndaǵy birlesken jobalarǵa da basymdyq berilmek.

The Caspian Post: Qazaqstan men Germanııa jańa birlesken jobalardy damytýǵa nıetti

The Caspian Post basylymy Qasym-Jomart Toqaev pen Germanııa kantsleri Frıdrıh Mertstiń kelissózder barysynda eki el arasyndaǵy kópjaqty yntymaqtastyqty odan ári nyǵaıtýǵa nıetti ekenin jazdy. Taraptar ózara baılanysty keńeıtý úshin qolaıly jaǵdaı qalyptastyrý qajettigin atap ótken.

Kelissózderdiń negizgi baǵyttarynyń biri saýda-ekonomıkalyq baılanystar boldy. Qasym-Jomart Toqaev Germanııanyń Qazaqstannyń negizgi saýda seriktesteri men jetekshi sheteldik ınvestorlarynyń qatarynda ekenin atap ótti. Ónerkásip, strategııalyq mańyzy bar mıneraldar, kólik jáne logıstıka, tsıfrlyq tehnologııalar, sondaı-aq mashına jasaý men hımııa ónerkásibi perspektıvaly baǵyttar retinde ataldy.

Ekonomıkalyq yntymaqtastyqtyń aýqymy naqty kórsetkishterden de kórinedi. Basylymnyń málimetinshe, byltyr eki el arasyndaǵy taýar aınalymy 4,5 mlrd dollarǵa jetip, 13,4%-ǵa ósken. Sońǵy 21 jylda Germanııanyń Qazaqstanǵa salǵan ınvestıtsııasy 8 mlrd dollardy quraǵan. Al birlesken ınvestıtsııalyq portfelde jalpy quny shamamen 54 mlrd dollar bolatyn 40 ónerkásiptik joba bar.

Yntymaqtastyq ekonomıkamen shektelmeıdi. Qazaqstan men Germanııa halyqaralyq uıymdar aıasyndaǵy, sonyń ishinde «Ortalyq Azııa – Germanııa» formatyndaǵy ózara is-qımyldy jandandyrýǵa kelisti. Sonymen qatar bilim, ǵylym jáne mádenı-gýmanıtarlyq baılanystardy keńeıtý máseleleri de talqylandy.

Kelissózder sońynda Qasym-Jomart Toqaev Frıdrıh Mertsti Qazaqstanǵa memlekettik saparmen kelýge shaqyrdy.

The Times of Central Asia: Toqaevtyń Berlındegi kelissózderi – Ýkraına, Pýtın jáne Qazaqstanǵa ekonomıkalyq qyzyǵýshylyq

The Times of Central Asia Qasym-Jomart Toqaevtyń Berlınge sapary barysynda Ýkraınadaǵy qaqtyǵys, Qazaqstannyń Reseımen qarym-qatynasy, energetıka jáne Germanııanyń Ortalyq Azııa shıkizatyna qyzyǵýshylyǵy negizgi taqyryp bolǵanyn jazdy. Kelissózderde Qazaqstan munaıynyń jetkizilimin arttyrý, strategııalyq mańyzy bar mıneraldar, nemis ınvestıtsııalary jáne Azııa men Eýropany baılanystyratyn kólik baǵyttary da talqylanǵan.

Basylym Ýkraınadaǵy jaǵdaıǵa qatysty Qasym-Jomart Toqaev pen Germanııa kantsleri Frıdrıh Mertstiń pikirlerine toqtalǵan. Qasym-Jomart Toqaev qazirgi jaǵdaıda qaqtyǵysty qysqa merzimde aıaqtaý qıyn ekenin aıtyp, aldymen soǵys qımyldaryn toqtatyp, keıin dıplomatııalyq kelissózderge kóshýdi usynǵan.

Osy taqyryppen sabaqtas túrde basylym Qazaqstan men Reseı arasyndaǵy qarym-qatynasqa da nazar aýdarady. Qasym-Jomart Toqaev eki el arasyndaǵy tyǵyz baılanystardy atap ótip, Qazaqstannyń BUU Jarǵysy men memleketterdiń aýmaqtyq tutastyǵy qaǵıdattaryn ustanatynyn rastaǵan.

Saıası máselelermen qatar, energetıkalyq yntymaqtastyq ta kelissózderdiń mańyzdy baǵyty bolǵan. The Times of Central Asia Germanııanyń Qazaqstan munaıyn kóbirek satyp alýǵa múddeli ekenin, al Qazaqstan jetkizilim kólemin ulǵaıtýǵa nıetti ekenin habarlaıdy.

Yntymaqtastyqtyń kelesi baǵyty – strategııalyq mańyzy bar mıneraldar. Qazaqstan ýran, hrom, tıtan jáne Eýropa ónerkásibine qajetti basqa da materıaldardy óndiredi. Astana sheteldik seriktesterdi shıkizatty óndirýmen qatar, ony Qazaqstan aýmaǵynda óńdeýge tartýdy kózdeıdi. Osy rette Qasym-Jomart Toqaev nemistiń shaǵyn jáne orta ónerkásiptik kompanııalaryn Qazaqstanda óndiris oryndaryn ashýǵa shaqyrǵan.

Ekonomıkalyq baılanystardy keńeıtýde kólik-logıstıka salasynyń da mańyzy zor. Basylym Qazaqstannyń Transkaspıı halyqaralyq kólik baǵyty arqyly júk tasymaldaý kólemin 20 mln tonnaǵa deıin arttyrýdy josparlap otyrǵanyn jazady. Qazaqstan sondaı-aq nemistiń kólik jáne logıstıka kompanııalaryn, sonyń ishinde Aqtaý portyndaǵy jobalarǵa qatysýǵa shaqyrady.

Materıal sońynda basylym Germanııanyń Qazaqstanǵa qyzyǵýshylyǵynyń artýy óńdeý jáne óndiris salalaryna ınvestıtsııa tartýǵa, sondaı-aq shıkizatpen birge daıyn ónim eksportyn ulǵaıtýǵa múmkindik beretinin atap ótedi.

Anadolu Ajansı: qos prezıdent ekijaqty qarym-qatynastardy talqylady

Túrkııanyń Anadolu Ajansı aqparat agenttigi Qasym-Jomart Toqaevtyń Berlınde Germanııa Prezıdenti Frank-Valter Shtaınmaıermen jáne Kantsler Frıdrıh Mertspen jeke kelissózder júrgizgenin jazdy. Shtaınmaıermen kezdesýde Qasym-Jomart Toqaev Germanııany Qazaqstannyń Eýropadaǵy negizgi strategııalyq seriktesi dep atap, kelesi jyly eki el arasyndaǵy dıplomatııalyq qatynastardyń ornaǵanyna 35 jyl tolatynyn aıtty.

Kezdesý qorytyndysynda taraptar Qazaqstan men Germanııa arasyndaǵy yntymaqtastyqty nyǵaıtýǵa baǵyttalǵan Birlesken deklaratsııaǵa qol qoıdy. Qujatta saýda, ınvestıtsııa, energetıka, kólik, tsıfrlandyrý jáne bilim berý salalaryndaǵy ózara is-qımyldy keńeıtýge basymdyq berilgen. Sonymen qatar qos tarap BUU Jarǵysyna sáıkes Ýkraınada jan-jaqty, ádil ári turaqty beıbitshilik ornatýdy qoldaıtynyn málimdedi.

Al Frıdrıh Mertspen kelissózderde ekonomıkalyq yntymaqtastyqtyń naqty baǵyttary talqylandy. Taraptar ónerkásip, strategııalyq mańyzy bar mıneraldar, kólik jáne logıstıka, tsıfrlyq tehnologııalar men qosylǵan quny joǵary ónim óndirý salalaryndaǵy seriktestikti damytý áleýetin atap ótti.

Bul baǵyttar eki el arasyndaǵy saýda jáne ınvestıtsııalyq baılanystardyń aýqymymen sabaqtas. Qasym-Jomart Toqaevtyń aıtýynsha, ótken jyly Qazaqstan men Germanııa arasyndaǵy taýar aınalymy 4,5 mlrd dollarǵa jetip, 13,4%-ǵa ósken. Sońǵy 21 jylda Germanııanyń Qazaqstanǵa salǵan ınvestıtsııasy 8 mlrd dollardy qurasa, birlesken ınvestıtsııalyq portfelde jalpy quny shamamen 54 mlrd dollar bolatyn 40 ónerkásiptik joba bar.

Ekonomıkalyq seriktestikpen qatar, taraptar halyqaralyq uıymdar aıasyndaǵy, sonyń ishinde «Ortalyq Azııa – Germanııa» formatyndaǵy ózara is-qımyldy jandandyrýǵa kelisti. Bilim, ǵylym jáne mádenıet salalaryndaǵy baılanystardy damytý da kelissózderdiń mańyzdy bóligi boldy. Qasym-Jomart Toqaev Germanııa kantslerin Qazaqstanǵa memlekettik saparmen kelýge shaqyrdy.

Berlındegi kelissózder naqty kommertsııalyq ýaǵdalastyqtarmen de bekidi. Sapar qorytyndysynda Qazaqstan men Germanııa jalpy somasy 2 mlrd dollar bolatyn 30-dan astam kommertsııalyq qujatqa qol qoıdy, dep jazady Anadolu Ajansı.

Eske salaıyq, Toqaev Germanııa Prezıdentin «Altyn Qyran» ordenimen marapattady.