«Jarqyraǵan Aqjan» tarıhy aýstralııalyq Hoofbeats jýrnalynda jarııalandy

ASTANA. KAZINFORM — Prezıdent Qasym-Jomart Toqaev pen Aqjan atty aqalteke Aýstralııanyń jylqy sharýashylyǵyna arnalǵan Hoofbeats jýrnalynyń muqabasyna shyqty. Basylymnyń jańa sanynda sırek tústi sáıgúliktiń ereksheligi men Qazaqstannyń jylqy mádenıetindegi orny týraly jazylǵan.

Toqaevtyń Aqjan atty aqaltekesi aýstralııalyq jýrnaldyń muqabasyna shyqty
Foto: Kazinform

Aýstralııalyq Hoofbeats jýrnalynyń muqabynda qylańboz Aqjandy jemdep turǵan sáti beınelengen. Shimmering Aqzhan, ıaǵnm «Jarqyraǵan Aqjan» dep atalatyn maqalada Prezıdenttiń jylqyǵa degen qyzyǵýshylyǵy, Qazaqstannyń ulttyq murasy men zamanaýı elordasynyń nyshanyna aınalǵany sóz bolady.

— Prezıdent Qasym-Jomart Toqaev Aqjanǵa erekshe yqylas tanytyp otyr. Erekshe jaratylǵan jas jylqynyń qora syrtynda da kútimi muqııat uıymdastyrylyp, ózi barǵan saıyn tanymal bola túskeni qyzyq kórinedi, — dep jazady basylym.

Toqaevtyń Aqjan atty aqaltekesi aýstralııalyq jýrnaldyń muqabasyna shyqty
Foto: Kazinform

Aqjan 2025 jylǵy 30 naýryzda Astanada týǵan. Ol Prezıdent Іs basqarmasynyń at qorasyndaǵy jeti ahalteke jylqysynyń biri. Tulpardyń júni sırek kezdesetin ızabella tústi. Mundaı reńk aqalteke tuqymdy jylqylardyń shamamen 3 paıyzynda ǵana kezdesedi. Aqjannyń kúndelikti kútimi men damýyn arnaıy bapkerler, atbegiler jáne veterınarlar toby qadaǵalaıdy.

Basylym jas jylqynyń taǵdyryn Qazaqstannyń damýymen sabaqtastyrady. Avtorlardyń aıtýynsha, Aqjan eldiń atbegilik dástúriniń qazirgi kelbetin beınelep turǵandaı.

— Aqjan osy baılanystyń aıryqsha ádemi kórinisin tanytady. Ol — zamanaýı shaharda ómir súrip jatqan kóne tuqymnyń ókili. Dala kelbetin záýlim ǵımarattary boı kótergen qalaǵa alyp kelgen. Onyń bolmysy dástúrli jylqy ósirý tájirıbesiniń jemisi bolǵanymen, beınesi zamanaýı aqparat quraldary arqyly búkil álemge tarady, — delingen maqalada.

Aýstralııalyq basylym maqalasyn Aqjannyń Qazaqstannyń ótkenin saqtaı otyryp, bolashaqqa qadam basqan el ekenin tanytatyny týraly tujyrymmen aıaqtaıdy.

— Bálkim aqshyl tústi, erekshe jarqyraǵan aqalteke kópshiliktiń nazaryn aýdarýy da sondyqtan shyǵar. Aqjan ótken men bolashaqtyń birin tańdaýǵa májbúr bolǵan Qazaqstandy emes, ekeýin de qatar alyp kele jatqan Qazaqstandy beıneleıdi, — dep jazady jýrnal.

Hoofbeats — jylqy ósirý, baptaý jáne kútip-baptaý máselelerin jazatyn aýstralııalyq basylym. Aqjan týraly maqala jýrnaldyń 48-tomynyń 3-sanynda jarııalanǵan.

Maqalanyń túpnusqasyn osy jerden oqı alasyzdar.