Hyundai elimizde Tucson-nyń jańa modelin shyǵarady
ASTANA. KAZINFORM — Memleket basshysy Hyundai Motor Group korporatsııasynyń prezıdenti ári strategııa jáne josparlaý jónindegi bólim jetekshisi Sýng Kımdi qabyldady.
Aqordanyń habarlaýynsha, kezdesýde ınvestıtsııalyq jáne ónerkásiptik-tehnologııalyq yntymaqtastyq aıasyn keńeıtý, sondaı-aq Qazaqstanda jańa aýqymdy jobalardy iske asyrý perspektıvasy talqylandy.
Oǵan koreı tarapynan Hyundai Motor Group tobyna kiretin Hyundai Engineering men Kia avtokontsernderiniń ókilderi qatysty.
Qasym-Jomart Toqaev Hyundai Motor Group korporatsııasy Qazaqstannyń avtokólik ónerkásibin damytýǵa aıtarlyqtaı úles qosqanyn atap ótip, óndiristi lokalızatsııalaýdy odan ári tereńdetý, avtobólshekterdi kóptep shyǵarý jáne eksporttyq saladaǵy áleýetin nyǵaıtý sharalarynyń mańyzyna toqtaldy. Bul rette Almatydaǵy Hyundai jáne Qostanaıdaǵy Kia zaýyttary erekshe ról atqarady.
Osy oraıda, Prezıdent Qazaqstandy avtomobıl óndirisi men eksporty boıynsha iri óńirlik ortalyqqa aınaldyrý, óndiristiń tolyq tsıklin damytýǵa den qoıý syndy perspektıvti mindetter aıqyndalǵanyn aıtty.
Memleket basshysy seriktestiktiń taǵy bir mańyzdy baǵyty retinde elektr kóligi salasyna, ıaǵnı elektromobıl óndirisi, onyń qosalqy bólshekteri men qýattaý ınfraqurylymyn jasaqtaýǵa nazar aýdardy.
Sýng Kım Hyundai men Kia jobalaryna udaıy qoldaý kórsetip kele jatqany úshin Qasym-Jomart Toqaevqa alǵys aıtty. Hyundai Motor Group jetekshisi kompanııa úshin Qazaqstan naryq qana emes, TMD elderi boıynsha mańyzdy óńirlik ortalyq sanalatynyn jetkizdi.
Ol korporatsııanyń Qazaqstandaǵy qyzmet aıasyn keńeıtýge jáne óndiristi lokalızatsııalaýdy arttyrýǵa nıetti ekenin rastady.
Budan bólek, Hyundai Engineering basshylyǵy munaı-gaz, ónerkásip jáne ınfraqurylym salalaryndaǵy yntymaqtastyqty damytýǵa daıyn ekenin atap ótti.
Kia kompanııasynyń ókilderi Qazaqstannyń ulttyq avtomobıl brendin qalyptastyrýǵa úles qosý nıetin málimdedi.
Kezdesý sońynda Batys Qazaqstan oblysynda gaz óńdeý zaýytyn salý týraly QazaqGaz, Hyundai Engineering jáne SICIM Kazakhstan kompanııalary arasynda, sondaı-aq Hyundai Tucson jańa modeliniń óndirisi jóninde Hyundai Motor Company men Astana Motors kompanııalary arasynda kelisimderge qol jetkizildi.
Eske salaıyq, buǵan deıin Memleket basshysy Lotte Group kompanııasynyń basqarma tóraǵasy Don Bın Shındi qabyldaǵanyn habarlaǵan edik.
