Toqaev «Jetisý» voleıbol klýbynyń jaı-kúıimen tanysty
TALDYQORǴAN. KAZINFORM — Prezıdent «Jetisý» voleıbol klýbynyń oqý-jattyǵý keshenin aralap kórdi, dep habarlaıdy Aqordanyń baspasóz qyzmeti.
Bıyl paıdalanýǵa berilgen ǵımarattyń qurylysyna 1,2 mıllıard teńge jumsalǵan.
Aýdany 1 639,4 sharshy metr bolatyn nysan eki bloktan turady. Úsh qabatty negizgi ǵımarat voleıboldan oqý-jattyǵý sabaqtaryn, dene shynyqtyrý-saýyqtyrý protsesterin ótkizýge arnalǵan.
Keshende sport jáne jattyǵý zaldary, medıtsınalyq, ákimshilik kabınetteri bar.
Memleket basshysy sportshylarǵa arnalǵan turǵynjaımen tanysty. Onda páterlerden bólek, ashana, oqý kabınetteri men demalys aımaǵy qarastyrylǵan. Jeke ınvestor salǵan ǵımarattyń aýdany — 3866,5 sharshy metr.
Qasym-Jomart Toqaev mamandarmen jáne sportshylarmen áńgimelesip, komandanyń jaqsy oıyn úlgisin kórsetip júrgenin atap ótti.
Sondaı-aq osyǵan deıin Almaty qalasynda jattyǵyp kelgen klýbtyń endi oblysta daıyndyq jasaı alatynyna nazar aýdardy. Sóz sońynda sportshylarǵa halyqaralyq deńgeıde óner kórsetý qajet ekenin aıtyp, aldaǵy jarystarda jeńiske jetýlerine tilektestik bildirdi.
Komanda músheleri qolaıly jaǵdaı jasalǵany úshin Memleket basshysyna alǵys aıtyp, voleıbol dobyna qoltańba qaldyrýyn surady.
Buǵan deıin Memleket basshysy Yntymaq aýylyndaǵy №30 orta mektepti aralap kórdi.